రెబల్ స్టార్ ప్రభాస్ (Rebel Star Prabhas), మాస్ డైరెక్టర్ ప్రశాంత్ నీల్ (Prashanth Neel) కాంబినేషన్లో తెరకెక్కిన ‘సలార్’ (Salaar) బాక్సాఫీస్ను షేక్ చేసిన సంగతి తెలిసిందే. ప్రభాస్ను ఇంతకు ముందు ఎప్పుడూ చూడని పవర్ఫుల్ లుక్లో చూపించిన ఈ సినిమా విడుదలై నేటికి రెండేళ్లు పూర్తయ్యాయి. ఈ సందర్భంగా సోషల్ మీడియాలో ప్రభాస్ అభిమానులు ‘సలార్’ జ్ఞాపకాలను మళ్లీ ట్రెండ్ చేస్తూ సంబరాలు చేసుకుంటున్నారు.
అయితే సినిమా వచ్చి రెండేళ్లు అవుతున్నా ఇప్పటివరకు ‘సలార్–2’ (Salaar-2) షూటింగ్పై మేకర్స్ నుంచి ఎలాంటి అధికారిక ప్రకటన రాకపోవడంతో అభిమానుల్లో కొంత అసహనం కనిపిస్తోంది. ప్రభాస్ వరుస సినిమాలతో బిజీగా ఉండటం, ప్రశాంత్ నీల్ కూడా తన తదుపరి ప్రాజెక్టులపై దృష్టి పెట్టడంతో సీక్వెల్ ఎప్పుడు మొదలవుతుందన్నది హాట్ టాపిక్గా మారింది.
ఇదిలా ఉండగా, గతంలో ప్రశాంత్ నీల్ ఇచ్చిన ఓ కీలక అప్డేట్ ఇప్పుడు ఫ్యాన్స్కు ఊరటనిస్తోంది. “సలార్–2 నా కెరీర్లోనే బెస్ట్ సినిమా అయ్యేలా ప్లాన్ చేస్తున్నాను. ఇప్పటివరకు రాసుకున్న స్క్రిప్ట్స్లో ఇదే అత్యుత్తమం. ప్రేక్షకులు ఊహించని స్థాయిలో ఈ సీక్వెల్ ఉంటుంది” అని ఆయన చెప్పడం అంచనాలను మరింత పెంచింది. పార్ట్–1 కేవలం శాంపిల్ మాత్రమేనని, అసలు సిసలు యాక్షన్ పార్ట్–2లోనే ఉంటుందని ఆయన మాటల ద్వారా స్పష్టమవుతోంది. పృథ్వీరాజ్ సుకుమారన్, శృతి హాసన్, జగపతి బాబు వంటి భారీ స్టార్ కాస్టింగ్ ఉండటంతో ‘సలార్–2’పై అంచనాలు మరింత ఆకాశాన్ని తాకుతున్నాయి.
