బాలీవుడ్ నటుడు సైఫ్ అలీఖాన్ ఈ ఏడాది జనవరిలో ఓ దుండగుడి దాడిలో గాయపడిన సంగతి తెలిసిందే. వారం రోజుల చికిత్స తర్వాత ఆయన కోలుకున్నారు. ఈ దాడి సంఘటన గురించి తాజాగా ఓ టాక్ షోలో సైఫ్ స్పందించారు. ఈ దాడిని కొందరు కేవలం ‘నాటకం’గా చిత్రీకరించడంపై ఆయన తీవ్ర అసహనం వ్యక్తం చేశారు. నిజానికి ఇది చాలా సీరియస్‌గా పరిగణించాల్సిన అంశమని సైఫ్ అన్నారు. “ఇలాంటి సమాజంలో మనం జీవిస్తున్నాం, ఇలాంటి సందర్భాల్లో కొందరు నిజాలను సరిగా అర్థం చేసుకోరు,” అని ఆయన పేర్కొన్నారు.
నడిచి రావడంపై అపోహలు
ఆసుపత్రి నుండి డిశ్చార్జ్ అయినప్పుడు జరిగిన సంఘటన గురించి సైఫ్ వివరిస్తూ, “అంబులెన్స్‌లో లేదా వీల్‌చైర్‌లో బయటకు వస్తే నాకు తీవ్రంగా గాయాలయ్యాయని మీడియా, అభిమానులు భావిస్తారు. నేను బాగానే ఉన్నానని చూపించడానికి నడిచి వచ్చా. కానీ, కొందరు దీన్ని తప్పుగా అర్థం చేసుకున్నారు. ‘అసలు ఎలాంటి దాడి జరగలేదు, ఇది నాటకం’ అని ప్రచారం చేశారు. నిజానికి నా పరిస్థితి, గాయాలు నిజం,” అని సైఫ్ తన బాధను పంచుకున్నారు.
దాడి వివరాలు
జనవరి 16న జరిగిన ఈ దాడిపై ముంబయి పోలీసులు కేసు నమోదు చేసి విచారణ చేపట్టారు. బంగ్లాదేశ్‌కు చెందిన మహ్మద్ షరీఫుల్ ఇస్లాం షెహజాద్ అనే వ్యక్తిని పోలీసులు అరెస్ట్ చేశారు. కేవలం రూ. 30 వేల కోసం అతను సైఫ్‌పై దాడి చేసినట్లు విచారణలో వెల్లడైంది. ఈ ఘటన తన జీవితంలో ఒక సీరియస్ అనుభవంగా మారిందని, అలాగే సమాజంలో అభిమానులు, మీడియా ఎలా స్పందిస్తారో తెలుసుకోవడానికి ఇది ఒక అనుభవంగా నిలిచిందని సైఫ్ పేర్కొన్నారు.
