గోదావరి-బనకచర్ల (Godavari-Banakacharla) అనుసంధాన ప్రాజెక్టు (Linking Project) విషయంలో గురుశిష్యులుగా పేరుగాంచిన తెలుగు రాష్ట్రాల సీఎంలు చంద్రబాబు నాయుడు (Chandrababu Naidu), రేవంత్‌రెడ్డిల మధ్య “అర్ధరాత్రి చీకటి ఒప్పందం” జరిగిందని, రేవంత్ రెడ్డి తెలంగాణ ప్రజలను మోసం చేస్తూ రాష్ట్ర ప్రయోజనాలను తాకట్టు పెడుతున్నారని బీఆర్ఎస్ పార్టీ సీనియ‌ర్ నేత, మాజీ మంత్రి హ‌రీష్‌రావు ఆరోపించారు. “బనకచర్లపై చర్చకు వెళ్లనని, ఢిల్లీ సమావేశాన్ని బహిష్కరిస్తానని చెప్పిన రేవంత్ రెడ్డి, రాత్రికి రాత్రి ఢిల్లీకి వెళ్లి చంద్రబాబుతో చర్చలు జరిపారు. ఇది రాష్ట్ర ప్రజలను మోసం చేయడం కాదా?” అని హరీష్ రావు ప్రశ్నించారు. ముఖ్య‌మంత్రులు రేవంత్ రెడ్డి, చంద్రబాబు నాయుడిపై హ‌రీష్‌రావు తీవ్ర ఆరోపణలు చేశారు.
జూలై 16న ఢిల్లీలో కేంద్ర జలశక్తి మంత్రి సీఆర్ పాటిల్ సమక్షంలో రేవంత్ రెడ్డి, చంద్రబాబు నాయుడు సమావేశం జరిగింది. ఈ సమావేశంలో బనకచర్ల అంశం చర్చకు రాలేదని, “ప్రాజెక్టు కట్టాలనే ప్రతిపాదన ఎజెండాలో లేనప్పుడు, ఆపమనే చర్చ రాదు” అని రేవంత్ మీడియాకు చెప్పారు. వెంట‌నే ఆంధ్రప్రదేశ్ మంత్రి నిమ్మల రామానాయుడు బనకచర్లపై చర్చ జరిగి, వారంలోపు కమిటీ ఏర్పాటు చేస్తామని అదే మీడియాకు చెప్పారు. ఈ వైరుధ్యంపై హరీష్ రావు “ఎజెండాలో మొదటి అంశం బనకచర్ల ఉంటే, రేవంత్ రెడ్డి అది లేదని నిస్సిగ్గుగా అబద్ధాలు చెప్పారు. ఇది రాష్ట్ర ప్రయోజనాలను మట్టిలో తొక్కడం” అని విమర్శించారు.
“బనకచర్లపై కమిటీ ఏర్పాటు చేస్తే ఒప్పుకుంటామని రేవంత్ రెడ్డి చెప్పడం, చంద్రబాబు చెప్పినట్లు కేంద్రం వింటుందని, గోదావరి జలాలను ఆంధ్రప్రదేశ్‌కు తరలించేందుకు రేవంత్ ఒప్పుకుంటారని” ఆరోపించారు. తెలంగాణ నీటిపారుదల శాఖ మంత్రి ఉత్తమ్‌కుమార్ రెడ్డి, బనకచర్ల ప్రాజెక్టును గోదావరి రివర్ మేనేజ్‌మెంట్ బోర్డు, సెంట్రల్ వాటర్ కమిషన్ వ్యతిరేకిస్తున్నాయని, తెలంగాణ దీన్ని నిరసిస్తోందని స్పష్టం చేశారు. ఈ వివాదం రాష్ట్రాల మధ్య నీటి వివాదాలను మరింత ఉద్ధృతం చేసే అవకాశం ఉంది.
