హైదరాబాద్‌ (Hyderabad)లోని రాజేంద్రనగర్ పోలీస్ స్టేషన్ (Rajendranagar Police Station)లో ఆటో డ్రైవర్ (Auto Driver) మృతి ఘటన (Death Incident)పై జాతీయ మానవ హక్కుల కమిషన్ (NHRC) సీరియస్‌గా స్పందించింది. ఈ ఘటనను సుమోటోగా స్వీకరించిన కమిషన్, తెలంగాణ డైరెక్టర్ జనరల్ ఆఫ్ పోలీస్ (డీజీపీ)(DGP) జితేందర్‌ (Jitender)కు నోటీసులు జారీ చేసి, రెండు వారాల్లో సమగ్ర నివేదిక సమర్పించాలని ఆదేశించింది.
వివ‌రాల్లోకి వెళితే.. ఆటో డ్రైవర్ మొహ్ద్ ఇర్ఫాన్ (Mohd Irfan) (35)ను మే 13న రాజేంద్రనగర్ పోలీస్ స్టేషన్‌కు వైవాహిక బంధానికి సంబంధించిన వివాదంలో విచారణ నిమిత్తం తీసుకెళ్లారు. అతని భార్య సోదరులు ఫిర్యాదు చేయడంతో, పోలీసులు ఇర్ఫాన్‌ను విచారణ కోసం ఒక గదిలోకి తీసుకెళ్లి, రబ్బర్ బెల్టు (Rubber Belts)లతో తీవ్రంగా కొట్టినట్లు ఆరోపణలు ఉన్నాయి. విచారణ తర్వాత స్టేషన్ నుంచి బయటకు వచ్చిన ఇర్ఫాన్ వాంతులు చేసుకుని, కుప్పకూలి మరణించినట్లు కుటుంబ సభ్యులు తెలిపారు. ఈ ఘటన మానవ హక్కుల ఉల్లంఘనగా భావించిన NHRC, ఈ ఆరోపణలు నిజమైతే, అవి తీవ్రమైన హక్కుల ఉల్లంఘనలకు సంబంధించినవని పేర్కొంది.
ఈ ఘటనపై సామాజిక మాధ్యమాల్లో విస్తృత చర్చ జ‌రిగింది. ప్ర‌తిప‌క్ష పార్టీలు సైతం పోలీసుల చ‌ర్య‌ను తీవ్రంగా త‌ప్పుబ‌ట్టాయి. స్థానిక హక్కుల సంఘాలు మరియు సామాజిక వర్గాలు ఈ ఘటనపై ఆందోళన వ్యక్తం చేస్తూ, బాధిత కుటుంబానికి న్యాయం జరిగేలా చర్యలు తీసుకోవాలని డిమాండ్ చేశాయి.
NHRC ఈ కేసును తీవ్రంగా పరిగణించి, ఘటనకు సంబంధించిన పూర్తి వివరాలతో నివేదిక అందజేయాలని డీజీపీని కోరింది. అలాగే, బాధిత కుటుంబానికి న్యాయం జరిగేలా తగిన చర్యలు తీసుకోవాలని స్పష్టం చేసింది. రాజేంద్రనగర్ పోలీస్ స్టేషన్‌లో జరిగిన ఈ ఘటన NHRC జోక్యంతో రాష్ట్రవ్యాప్తంగా మ‌రోసారి చ‌ర్చ‌నీయాంశంగా మారింది.
