రాజధాని (Capital) ఢిల్లీ (Delhi)లో రాజకీయ వాతావరణం ఒక్కసారిగా ఉద్రిక్తంగా మారింది. కాంగ్రెస్ సీనియర్ నేత, లోక్సభ ప్ర‌తిప‌క్ష నేత రాహుల్ గాంధీ (Rahul Gandhi)తో పాటు ఇండియా కూటమి (INDIA Alliance)కి చెందిన పలువురు ఎంపీ(MP)లను ఢిల్లీ పోలీసులు అదుపులోకి తీసుకున్నారు. ఎన్నికల సంఘం (ఈసీ)(EC) కార్యాలయం వైపు నిరసన మార్చ్ (March)లో పాల్గొన్న ఈ నాయకులను పోలీసులు మార్గమధ్యంలో అడ్డుకొని అరెస్టు (Arrest) చేశారు. ఈ ఘటన దేశవ్యాప్తంగా కాంగ్రెస్ శ్రేణుల్లో ఆగ్రహాన్ని రేకెత్తించింది. ఈ నిరసనలు బీహార్‌లో ఓటరు జాబితా సవరణతో పాటు 2024 లోక్సభ ఎన్నికల్లో “ఓటు చోరీ” ఆరోపణల నేపథ్యంలో జరిగాయి.
రాహుల్ గాంధీ నేతృత్వంలో సుమారు 300 మంది ఇండియా కూటమి ఎంపీలు పార్లమెంట్ నుంచి నిర్వచన్ సదన్ (ఎన్నికల సంఘం కార్యాలయం) వైపు మార్చ్ చేపట్టారు. ఎన్నికల క‌మిష‌న్‌కు వ్య‌తిరేకంగా నినాదాలు చేస్తూ, ప్లకార్డులు ప్రదర్శిస్తూ, ఓటరు జాబితా సవరణలో అక్రమాలు జరిగాయని ఆరోపిస్తూ నిరసన తెలిపారు. అయితే, ఈ మార్చ్‌కు అనుమతి లేదని పేర్కొంటూ ఢిల్లీ పోలీసులు ట్రాన్స్‌పోర్ట్ భవన్ వద్ద బ్యారికేడ్లు ఏర్పాటు చేసి, రాహుల్ గాంధీ, ప్రియాంకా గాంధీ వాద్రా, సంజయ్ రౌత్, సాగరికా ఘోష్ సహా పలువురు నాయకులను అదుపులోకి తీసుకున్నారు. రాహుల్ గాంధీ, అదుపులోకి తీసుకునే సమయంలో, “ఇది రాజకీయ పోరాటం కాదు, రాజ్యాంగాన్ని కాపాడే పోరాటం” అని పేర్కొన్నారు. కాంగ్రెస్ అధ్యక్షుడు మల్లికార్జున్ ఖర్గే మాట్లాడుతూ.. “బీజేపీ నిరంకుశ వైఖ‌రి ఈ పోరాటాన్ని ఆపలేదు” అని ఆగ్రహం వ్యక్తం చేశారు.
ఈ అరెస్టులు దేశవ్యాప్తంగా కాంగ్రెస్, ఇండియా కూటమి కార్యకర్తల్లో తీవ్ర ఆందోళనను రేకెత్తించాయి. సమాజవాదీ పార్టీ అధినేత అఖిలేష్ యాదవ్ బ్యారికేడ్లు దూకి నిరసన కొనసాగించగా, తృణమూల్ కాంగ్రెస్ ఎంపీ మహువా మొయిత్రా అస్వస్థతకు గురై ఆస్పత్రికి తరలించబడ్డారు. కాంగ్రెస్ శ్రేణులు ఈ అరెస్టులను “ప్రజాస్వామ్య హత్య”గా అభివర్ణిస్తూ, దేశవ్యాప్త నిరసనలకు పిలుపునిచ్చాయి. విపక్షాలు ఎన్నికల సంఘంపై తీవ్ర ఆరోపణలు చేస్తూ, బీజేపీ(BJP)తో కుమ్మక్కై ఓటరు జాబితాలను మార్చుతోందని ఆరోపిస్తున్నాయి. ఈ ఘటన రాజకీయ ఉద్రిక్తతను మరింత పెంచడంతో, ఢిల్లీలో భద్రతను కట్టుదిట్టం చేశారు. ఈ వివాదం రాష్ట్ర, జాతీయ రాజకీయాల్లో ప్రజాస్వామ్యం, ఎన్నికల సంఘం స్వతంత్రతపై కీలక చర్చకు దారితీసింది.
