ఆపరేషన్ కగార్‌ (Operation Kagar) పేరుతో మావోయిస్టులపై (Maoists) కేంద్ర ప్రభుత్వం (Central Government) నిర్వహిస్తున్న సైనిక చర్యలను సినీ నటుడు, దర్శకుడు ఆర్. నారాయణమూర్తి (R. Narayana Murthy) తీవ్రంగా విమర్శించారు. పాకిస్తాన్‌ (Pakistan)తో శాంతి కోసం యుద్ధాన్ని నిలిపివేసిన కేంద్ర ప్రభుత్వం, మావోయిస్టులు శాంతి చర్చలకు సిద్ధంగా ఉన్నామని చెప్పినప్పటికీ, వారిని చంపడం ఎక్కడి న్యాయమని ఆయన ప్రశ్నించారు. హైద‌రాబాద్‌ (Hyderabad)లోని ప్రెస్‌క్ల‌బ్‌ (Press Club)లో నిర్వ‌హించిన కార్య‌క్ర‌మంలో ఆర్.నారాయణమూర్తి పాల్గొని మాట్లాడారు. ఆదివాసీల హక్కుల (Tribals Rights) కోసం పోరాడుతున్న ఉద్యమకారులను అణచివేసేందుకు ఈ ఆపరేషన్ ద్వారా అమాయక ఆదివాసీలు చనిపోతున్నారని, శాంతి చర్చలు జరపాలని మావోయిస్టులు కోరుతున్నప్పటికీ కేంద్ర ప్రభుత్వం స్పందించకపోవడం అమానవీయమని ఆయన ఆరోపించారు. ప్రధాని మోడీ (Prime Minister Modi), హోంమంత్రి అమిత్ షా (Home Minister Amit Shah)లను శాంతి చర్చలు జరపాలని ఆయన దండంపెట్టి కోరారు.
ఆర్. నారాయణమూర్తి మాట్లాడుతూ.. భారతదేశంలో పుట్టి, పేద‌ల కోసం పోరాడుతున్న మావోయిస్టులతో చర్చలు జరపకుండా, పాకిస్తాన్‌తో చర్చలు జరిపిన కేంద్ర ప్రభుత్వ వైఖరిని తప్పుబట్టారు. ఆదివాసీల భూములు, నీరు, అడవుల హక్కుల కోసం పోరాడుతున్న వారిని నిర్మూలించే బదులు, శాంతియుతంగా సమస్యను పరిష్కరించేందుకు చర్చలు జరపాలని ఆయన డిమాండ్ చేశారు. ఈ ఆపరేషన్‌లో చనిపోయిన వారి మృతదేహాలను కుటుంబ సభ్యులకు అప్పగించకపోవడం, హిందూ సంప్రదాయం ప్రకారం కర్మకాండలు జరిపించకపోవడం పట్ల ఆయన తీవ్ర ఆగ్రహం వ్యక్తం చేశారు. ఇలాంటి చర్యలు హిందూ సంప్రదాయాలకు విరుద్ధమని, బీజేపీ హిందూ పార్టీగా చెప్పుకునే నీతిని ప్రశ్నించారు.
ఆపరేషన్ కగార్‌ను వెంటనే నిలిపివేసి, మావోయిస్టులతో శాంతి చర్చలు జరపాలని ఆర్. నారాయణమూర్తి కేంద్ర ప్రభుత్వాన్ని కోరారు. శాంతి చర్చల ద్వారా ఈ సమస్యను పరిష్కరించి, ఆదివాసీల హక్కులను కాపాడాలని, అందరూ సమసమాజం కోసం కృషి చేయాలని ఆయన పిలుపునిచ్చారు. ఈ విషయంలో ప్రభుత్వం సానుకూలంగా స్పందించి, న్యాయం చేయాలని ఆయన డిమాండ్ చేశారు.
