ఆంధ్రప్రదేశ్ (Andhra Pradesh) శాసనసభ (Legislative Assembly)లో జీఎస్టీ (GST)పై జరిగిన చర్చలో డిప్యూటీ ముఖ్యమంత్రి పవన్ కళ్యాణ్ (Pawan Kalyan) కీలక వ్యాఖ్యలు చేశారు. దేశ ప్రగతికి జీఎస్టీ సంస్కరణలు బాటలు వేస్తాయని, ఈ సంస్కరణల్లో ఒకదానికి రాష్ట్ర ప్రతినిధిగా తానే బాధ్యత వహించానని ఆయన గుర్తుచేశారు. రాష్ట్ర ఆదాయానికి నష్టం కలిగే పరిస్థితులు వచ్చినా, సామాజిక ప్రయోజనాలను దృష్టిలో పెట్టుకుని ఆ సంస్కరణలను సమర్థించామని చెప్పారు.
పవన్ కళ్యాణ్ మాట్లాడుతూ, చరిత్రాత్మక జీఎస్టీ సంస్కరణలకు మద్దతు తెలిపిన తొలి రాష్ట్రం ఆంధ్రప్రదేశ్ అని తెలిపారు. సాధారణ ప్రజలు వినియోగించే ఉత్పత్తుల ధరలు తగ్గడం వల్ల వారికి నేరుగా లాభం కలుగుతుందని వివరించారు. అల్పాదాయ వర్గాలకు జీఎస్టీ తగ్గింపులు మరింత ఉపశమనాన్ని ఇస్తాయని అన్నారు.
తాజా జీఎస్టీ సంస్కరణలు ప్రజారోగ్య సంరక్షణకు కీలకంగా మారబోతున్నాయని పవన్ పేర్కొన్నారు. ఆరోగ్యరంగంలో ఖర్చులు తగ్గి, రక్షణగా నిలుస్తాయని విశ్వాసం వ్యక్తం చేశారు. జీఎస్టీ సంస్కరణలతో కేవలం ప్రభుత్వానికే కాకుండా, ప్రజల ఆదాయం మెరుగుపడే మార్గం సుగమమవుతుందని ఆయన నమ్మకం వ్యక్తం చేశారు. కేంద్ర ప్రభుత్వం తీసుకొస్తున్న సంస్కరణలు ప్రజలకు లాభదాయకమని, వాటిని అమలు చేయడంలో రాష్ట్రం ఎల్లప్పుడూ ముందుండబోతుందని పవన్ కళ్యాణ్ స్పష్టం చేశారు.
