బంగాళాఖాతం (Bay of Bengal)లో ఏర్పడిన ‘మొంథా’ (Montha) తుఫాన్ (Cyclone) తీరాన్ని తాకడం వల్ల తెలంగాణ (Telangana) రాష్ట్రంలో దాని ప్రభావం స్పష్టంగా కనిపిస్తోంది. హైదరాబాద్‌ (Hyderabad)తో సహా పలు జిల్లాల్లో విస్తారంగా వర్షాలు(Rains) కురుస్తున్నాయి. నగరంలో కుత్బుల్లాపూర్, కూకట్‌పల్లి, మియాపూర్, అల్వాల్, కాప్రా వంటి ప్రాంతాలలో ఎడతెరిపి లేకుండా వర్షం కురుస్తోంది. అలాగే, జూబ్లీహిల్స్, బంజారహిల్స్, గచ్చిబౌలి, హైటెక్‌సీటీ వంటి ఐటీ కారిడార్‌లలో కూడా వర్షాలు పడుతున్నాయి. దీని కారణంగా రోడ్లపై నీరు చేరి వాహనదారులు తీవ్ర ఇబ్బందులు పడుతున్నారు, రాకపోకలకు అంతరాయం ఏర్పడింది.
ఉమ్మడి ఖమ్మం జిల్లాపై తుఫాన్ ప్రభావం అధికంగా ఉంది. వర్షాల వల్ల వరి, పత్తి పంటలకు తీవ్ర నష్టం వాటిల్లింది. పాలేరు రిజర్వాయర్ లో పూర్తి నీటిమట్టం (23 అడుగులు)కి చేరువలో (22.5 అడుగులు) నీరు నిల్వ ఉంది. మణుగూరు, ఇల్లందు, సత్తుపల్లిలలోని ఓపెన్ కాస్ట్ బొగ్గు గనుల్లోకి వర్షపు నీరు చేరడంతో బొగ్గు ఉత్పత్తి తగ్గింది. ఐఎండీ (IMD) ఉమ్మడి ఖమ్మం, వరంగల్ జిల్లాలకు రెడ్ అలర్ట్ జారీ చేసింది. ప్రజలు అప్రమత్తంగా ఉండాలని, అవసరం లేకుండా బయటకు రావద్దని సూచించింది. రాష్ట్రంలోని ఇతర జిల్లాలకు కూడా ఆరెంజ్ అలర్ట్ ప్రకటించబడింది. రాబోయే గంటల్లో గాలివానలు, పిడుగులు, భారీ వర్షాలు సంభవించే అవకాశం ఉందని వాతావరణ శాఖ హెచ్చరించింది.
