రాజకీయాల్లో కొందరు నాయకులు నైతిక విలువలను గాలికొదిలేస్తున్నారు. పదవుల కోసం ఎత్తులు పక్కనబెట్టి జిత్తులకు పాల్పడుతున్నారు. ఎన్నికల్లో అవకాశం దక్కించుకునేందుకు అక్రమాలకు పాల్పడటం, చివరికి హత్యలు చేసేందుకు కూడా వెనుకాడటం లేదు. ఇదే కోవలో, జనసేన (Jana Sena) మాజీ నాయకురాలు కోట వినూత(Kota Vinootha)పై ఎమ్మెల్యే బొజ్జల సుధీర్‌రెడ్డి (Bojjala Sudheer Reddy) కుట్రలు చేశారంటూ సోషల్ మీడియాలో ఓ వీడియో వైరల్ అవుతోంది.
కోట వినూత వద్ద డ్రైవర్‌గా పనిచేసి హత్యకు గురైన రాయుడు తీసుకున్నట్టుగా చెబుతున్న సెల్ఫీ వీడియో ఇప్పుడు రాష్ట్ర వ్యాప్తంగా సంచలనం సృష్టిస్తోంది. కోట దంపతులను లక్ష్యంగా చేసుకొని, బొజ్జల తనకు డబ్బులు ఆశ చూపినట్లు ఆ డ్రైవర్ ఆ వీడియోలో స్పష్టంగా వెల్లడించడం తీవ్ర చర్చనీయాంశమైంది. అయితే, నేతల మధ్య రాజకీయ పోరులో దళిత యువకుడైన రాయుడు బలి కావడం విషాదకరంగా మిగిలింది.
టికెట్ కోసం కుట్ర: కోట రహస్యాలు, వీడియోల సేకరణ
జనసేన శ్రీకాళహస్తి నియోజకవర్గ మాజీ ఇన్‌చార్జి కోట వినూత డ్రైవర్‌గా పనిచేసిన శ్రీనివాసులు అలియాస్ రాయుడు(Rayudu) మాట్లాడిన సెల్ఫీ వీడియోలో ఎమ్మెల్యే బొజ్జల సుధీర్‌రెడ్డిపై పలు ఆరోపణలు వినిపించాయి. సార్వత్రిక ఎన్నికల సమయంలో ఎమ్మెల్యే టికెట్ దక్కించుకునేందుకే ఈ కుట్రకు తెరలేపినట్లు తెలుస్తోంది. ఈ కుట్రలో భాగంగానే కోట వినూత రహస్య సమాచారం, కొన్ని వీడియోలు సేకరించి అధిష్టానానికి చేరవేసి, సుధీర్‌రెడ్డి టికెట్ సంపాదించినట్లు శ్రీకాళహస్తి ప్రజలు గుసగుసలాడుకుంటున్నారు. బొజ్జల సు«దీర్‌రెడ్డి కారణంగా కూటమిలోని పలువురు నాయకులు రాజకీయంగా అణచివేతకు గురవుతున్నారనే ప్రచారం కూడా జోరుగా సాగుతోంది.
హత్యా రాజకీయాలకు తెర: రాయుడు వీడియోతో గుట్టురట్టు
రాష్ట్రంలో ఎన్నికల ముందు కూటమిగా ఏర్పడిన టీడీపీ(TDP), జనసేన (Jana Sena), బీజేపీ(BJP)లోని ప్రధాన నాయకులు టికెట్ల కోసం ఒకరిపై ఒకరు వెన్నుపోటు పొడుచుకున్న విషయం తెలిసిందే. ముఖ్యంగా శ్రీకాళహస్తి (Srikalahasti) టికెట్ కోసం ఏకంగా హత్యా రాజకీయాలకు తెరతీశారనే ప్రచారం కోట వినూత డ్రైవర్ రాయుడు వీడియో ద్వారా బయటపడింది. శ్రీకాళహస్తి అసెంబ్లీ టికెట్ కోసం కూటమిలోని బొజ్జల సు«దీర్‌రెడ్డి, మాజీ ఎమ్మెల్యేలు ఎస్సీవీ నాయుడు, సత్రవాడ మునిరామయ్య కుమారుడు, బీజేపీ నేత కోలా ఆనంద్, జనసేన నేత కోట వినూత పోటీ పడ్డారు. టికెట్ కోసం వారంతా తీవ్ర ప్రయత్నాలు చేశారు. ఈ క్రమంలో ఒకరిపై ఒకరు ఆరోపణలు, విమర్శలు చేసుకుంటూ.. అధిష్టానాలకు ఫిర్యాదులు కూడా చేసుకున్నారు. ఒక సందర్భంలో మీడియా ముఖంగా బహిరంగ విమర్శలు కూడా చేశారు.
డ్రైవర్‌కి రూ.60 లక్షల ఎర, కోవర్టు ఆపరేషన్
సార్వత్రిక ఎన్నికల సమయంలో కూటమి సీట్ల కేటాయింపులో శ్రీకాళహస్తి టికెట్ టీడీపీ లేదా జనసేనకు కేటాయిస్తారని ముందుగానే ఖరారైంది. దీంతో కోట వినూతను లక్ష్యంగా చేసుకుని, ఆమె డ్రైవర్‌ని కోవర్టుగా బొజ్జల సుధీర్‌రెడ్డి ఎంపిక చేసుకున్నట్లు రాయుడి వీడియో ద్వారా వెల్లడైంది. కూటమి నేతలు ఒకరి విషయాలు ఒకరు తెలుసుకునేందుకు కోవర్టులను నియమించుకున్నారని, కోట వినూత విషయంలో బొజ్జల చాలా పకడ్బందీగా వ్యూహం రచించినట్లు తెలుస్తోంది. అందుకే డ్రైవర్ రాయుడికి రూ.60 లక్షలు ఇచ్చేందుకు సిద్ధమైనట్లు వీడియో ద్వారా బయటపడింది. అలాగే అనేక మందిని పావుగా వాడుకున్నట్లు కూడా వెల్లడైంది. చివరకు కోట వినూత దంపతులను యాక్సిడెంట్ ద్వారా హత్య చేసేందుకు సైతం రెండుసార్లు ప్రయత్నించినట్లు రాయుడు తన వీడియోలో బయటపెట్టాడు. ఈ రాజకీయ పోరులో దళితుడైన సీహెచ్ శ్రీనివాసులు అలియాస్ రాయుడు హత్యకు గురవడం అప్పట్లో సంచలనం కలిగించింది. రాయుడు హత్యకు దారి తీసిన కారణాలు ఒక్కొక్కటిగా బయటపడుతుండటంతో ఈ అంశం రాష్ట్రవ్యాప్తంగా చర్చనీయాంశమైంది.
ఎమ్మెల్యేపై ఆరోపణలు నిజమేనా?
డ్రైవర్ రాయుడు హత్య తర్వాత అరెస్ట్ అయిన కోట వినూత దంపతులు మీడియా ముందు శ్రీకాళహస్తి ఎమ్మెల్యే బొజ్జల సుధీర్‌రెడ్డి పేరును ప్రస్తావించారు. రాయుడి హత్య వెనుక ఎవరి పాత్ర ఉందని మీడియా ప్రశ్నించినప్పుడు ఎమ్మెల్యే సుధీర్‌రెడ్డి పేరు చెప్పడం ఆనాడు కలకలం రేపింది. అన్ని విషయాలను త్వరలోనే బయటపెడతామని చెప్పినట్టుగానే.. నేడు రాయుడి వీడియో వైరల్ కావటం పెద్ద దుమారమే రేపుతోంది. శ్రీకాళహస్తి ఆలయ పాలకమండలి అధ్యక్ష పదవిని కొట్టే సాయికి కట్టబెట్టడం వెనుక ఎమ్మెల్యే బొజ్జల సు«దీర్‌రెడ్డి హస్తం ఉందని కోట వినూత లేఖ ద్వారా ఆరోపించింది.
బొజ్జల సుధీర్‌రెడ్డికి టికెట్ కేటాయించడం వెనుక జనసేనలోని మరో నాయకుడు కొట్టే సాయి ఉన్నారని రాయుడు వీడియో ద్వారా తెలుస్తోంది. అదే విధంగా శ్రీకాళహస్తిలో పలువురు ప్రధాన భూమిక పోషించారని డ్రైవర్ వీడియో ద్వారా వెల్లడవుతోంది. ఈ క్రమంలో రాబోయే రోజుల్లో ఇంకెన్ని వీడియోలు, వాయిస్ రికార్డులు బయటకు వస్తాయోనని కూటమి నేతలు, కార్యకర్తలు ఆందోళన చెందుతున్నారు.
