తెలంగాణ హైకోర్టు సంచలన తీర్పుతో రాష్ట్రవ్యాప్తంగా అధికార వర్గాల్లో కలకలం రేగింది. మెదక్ జిల్లా కలెక్టర్ రాహుల్ రాజ్పై న్యాయస్థానం ధిక్కరణ కేసులో ఆరు నెలల జైలు శిక్షతో పాటు రూ.2,000 జరిమానా విధిస్తూ కఠిన నిర్ణయం తీసుకుంది. భూ వివాదానికి సంబంధించిన కేసులో కోర్టు స్పష్టమైన ఆదేశాలు జారీ చేసినప్పటికీ, అవి అమలు చేయలేదని తీవ్రంగా అభ్యంతరం వ్యక్తం చేసింది.
ఉన్నతాధికారిగా బాధ్యతాయుతంగా వ్యవహరించాల్సిన కలెక్టర్ కోర్టు ఉత్తర్వులను నిర్లక్ష్యం చేయడం న్యాయవ్యవస్థకు అవమానకరమని ధర్మాసనం వ్యాఖ్యానించింది. ఈ తీర్పు ప్రభుత్వ యంత్రాంగానికి గట్టి హెచ్చరికగా మారింది. భూహక్కుల సమస్యపై ఒక మహిళ దాఖలు చేసిన పిటిషన్ నేపథ్యంలో హైకోర్టు వివాదంలో ఉన్న పక్షాలకు నోటీసులు జారీ చేసి సమస్యను పరిష్కరించాలని ఆదేశించింది.
అయితే గడువు ముగిసినా చర్యలు తీసుకోలేదని ఆరోపిస్తూ ఆమె మళ్లీ కోర్టును ఆశ్రయించడంతో ధిక్కరణ పిటిషన్పై విచారణ జరిగింది. ప్రభుత్వ అధికారులు చట్టానికి లోబడి పని చేయాలని, న్యాయస్థాన ఆదేశాలను అమలు చేయడం తప్పనిసరి అని కోర్టు స్పష్టం చేసింది. ఒక ఐఏఎస్ అధికారికి జైలు శిక్ష విధించడం అరుదైన ఘటనగా భావిస్తున్న న్యాయవర్గాలు, ఈ తీర్పు ఇతర అధికారులకు స్పష్టమైన సందేశమని చెబుతున్నాయి. ఇదిలా ఉండగా, కలెక్టర్ రాహుల్ రాజ్ డివిజన్ బెంచ్ను ఆశ్రయించే అవకాశముందని సమాచారం.
ముద్రగడకు పవన్ గవర్నర్ పదవి ఇద్దామన్నారు