కర్ణాటకలో మళ్లీ సీఎం మార్పు చర్చలు ఊపందుకున్నాయి. రాష్ట్ర డిప్యూటీ సీఎం డీకే శివకుమార్కు ముఖ్యమంత్రి పదవి అప్పగించే అవకాశం ఉందని ఇటీవల రాజకీయ వర్గాల్లో గుసగుసలు మొదలయ్యాయి. తాజాగా కాంగ్రెస్ ఎమ్మెల్యే ఇక్బాల్ హుస్సేన్ ఈ అంశాన్ని తెరపైకి తీసుకురావడంతో రాష్ట్ర రాజకీయ వాతావరణం మరింత రసవత్తరంగా మారింది. ఇక, డీకే శివకుమార్ వచ్చే రెండు మూడు నెలల్లో సీఎం పదవి స్వీకరించవచ్చన్న వ్యాఖ్యలు దేశవ్యాప్తంగా దృష్టిని ఆకర్షించాయి.
ఈ నేపథ్యంలో కాంగ్రెస్ సీనియర్ నేత ఆర్వి దేశ్పాండే సోమవారం కీలక ప్రకటన చేశారు. ముఖ్యమంత్రి సిద్ధరామయ్య ఐదేళ్ల పూర్తిస్థాయి పదవీకాలం నెరవేర్చుతారని స్పష్టం చేశారు. సీఎం మార్పుపై వస్తున్న వార్తలను పక్కన పెట్టాలన్నారు. సిద్ధరామయ్య – శివకుమార్ మధ్య ఎలాంటి విభేదాలూ లేవని, పార్టీ అధిష్ఠానం పరిశీలనలో విషయమన్నా ఉంటే వారు తగిన నిర్ణయం తీసుకుంటారని తెలిపారు.
“సిద్ధరామయ్య ఐదేళ్ల పాటు సీఎంగా కొనసాగుతారు. ఇప్పటి వరకు ఎలాంటి మార్పు ప్రతిపాదన లేదూ, చర్చ జరగలేదూ స్పష్టం చేయాలనుకుంటున్నాను. అసెంబ్లీ శాసనసభా పక్ష సమావేశంలో కూడా ఈ విషయంపై ఎలాంటి చర్చ జరగలేదు. మేమంతా ఐక్యంగా పని చేస్తున్నాం,” అని దేశ్పాండే తెలిపారు.
2023 అసెంబ్లీ ఎన్నికల అనంతరం సీఎం పదవిపై కాంగ్రెస్లో తీవ్ర స్థాయిలో చర్చ జరిగింది. సిద్ధరామయ్య – డీకే శివకుమార్ల మధ్య పదవుల పంచుకోలపై అంగీకారం జరిగినట్టు అప్పట్లో ప్రచారం జరిగింది. తాను ఎప్పటికైనా ముఖ్యమంత్రి అవుతానని శివకుమార్ కూడా అప్పట్లో బహిరంగంగా వ్యాఖ్యానించారు. తాజాగా ఈ అంశాన్ని మరోసారి పలువురు కాంగ్రెస్ నేతలు ప్రస్తావించడంతో మళ్లీ చర్చలు ఊపందుకున్నాయి.
సీఎం మార్పు అనేది పార్టీ అధిష్టానానికి సంబంధించిన వ్యవహారమని, తాను బహిరంగంగా ఏమీ వ్యాఖ్యానించనని సీఎం సిద్ధరామయ్య గతంలోనే స్పష్టం చేశారు. తాజా పరిణామాల నేపథ్యంలో ఆయనతో పాటు డీకే శివకుమార్ ఎలా స్పందిస్తారన్నది రాజకీయంగా ఆసక్తికర అంశంగా మారింది.
