జూబ్లీహిల్స్ ఉప ఎన్నికలో కాంగ్రెస్ పార్టీ తమ అభ్యర్థి ఎంపికపై దాదాపుగా ఒక నిర్ణయానికి వచ్చినట్లు తెలుస్తోంది. గతంలో ఎవరికి వారే అభ్యర్థినంటూ ప్రకటించుకోవద్దని సీఎం రేవంత్ రెడ్డి సున్నితంగా మందలించారు. మరోవైపు, మంత్రి పొన్నం ప్రభాకర్ గౌడ్ కూడా టికెట్ను పార్టీ స్థానిక వ్యక్తికే ఇస్తుందని పేర్కొన్నారు.
చర్చల్లో ఉన్న పేర్లు – మైనారిటీల విజ్ఞప్తి
గతంలో ఇదే స్థానం నుంచి పోటీ చేసి ఓడిపోయిన మహ్మద్ అజారుద్దీన్, పీజేఆర్ కుమార్తె విజయారెడ్డి, రేవంత్కు సన్నిహితుడైన రోహిన్రెడ్డిలతో పాటు నాంపల్లిలో పోటీ చేసి ఓడిన ఫిరోజ్ ఖాన్, బండి రమేష్, నవీన్ యాదవ్ల పేర్లు కాంగ్రెస్ నుంచి చర్చల్లోకి వచ్చాయి.
అయితే, తాజాగా కాంగ్రెస్ మైనారిటీ ప్రతినిధులు పీసీసీ చీఫ్ మహేష్ గౌడ్ను కలిశారు. కేబినెట్లో మైనారిటీలకు ప్రాతినిధ్యం లేదని, కనీసం ఈ ఉప ఎన్నిక టికెట్నైనా తమ వర్గానికి కేటాయించాలని విజ్ఞప్తి చేశారు. ఈ క్రమంలో అజారుద్దీన్ పేరును వాళ్లు బలపరిచినట్లు తెలుస్తోంది.
అధిష్టానం మొగ్గు – సీఎం రేవంత్తో చర్చలు
ఈ విజ్ఞప్తిని పీసీసీ చీఫ్ అధిష్టానం దృష్టికి తీసుకెళ్లగా, గత ఎన్నికల్లో పోటీ చేసి ఓడిపోయిన అజారుద్దీన్ వైపే అధిష్టానం మొగ్గు చూపుతున్నట్లు సమాచారం. ఇదే విషయమై తెలంగాణ ఇన్ఛార్జి మీనాక్షి నటరాజన్, పీసీసీ చీఫ్ మహేష్ గౌడ్లు సీఎం రేవంత్తో చర్చిస్తున్నారు.
జూబ్లీహిల్స్ ఉప ఎన్నిక ఆవశ్యకత
బీఆర్ఎస్ తరఫున నెగ్గిన మాగంటి గోపినాథ్ మృతితో జూబ్లీహిల్స్ ఉప ఎన్నిక అనివార్యమైంది. డిసెంబర్లోపు ఎన్నికల సంఘం ఈ ఉప ఎన్నికను నిర్వహించాల్సి ఉంది. ముఖ్యమంత్రి రేవంత్ రెడ్డి ఈ ఉప ఎన్నికను ప్రతిష్టాత్మకంగా తీసుకుంటున్నారు. హైదరాబాద్లో కాంగ్రెస్ బలాన్ని చూపించేందుకు ఇది ఒక అవకాశంగా భావిస్తున్నారు.
పిఠాపురంలో నాగబాబు.. వర్మ ఎపిసోడ్పై సైలెన్స్