రాష్ట్రవ్యాప్తంగా సంచలనం సృష్టించిన ప్రైవేట్ సర్వేయర్ తేజేశ్వర్ (32) హత్య కేసును గద్వాల పోలీసులు విజయవంతంగా ఛేదించారు. ఈ కేసులో ప్రధాన నిందితులుగా తేజేశ్వర్ భార్య, ఆమె తల్లి సుజాత, ఐశ్వర్య ప్రియుడు, కర్నూలుకు చెందిన బ్యాంక్ మేనేజర్ తిరుమల రావుతో సహా మొత్తం ఎనిమిది మందిని పోలీసులు అరెస్టు చేశారు. హత్య సమయంలో నిందితులు ఉపయోగించిన వస్తువులు, నగదు, మరియు హత్యకు ఉపయోగించిన స్విఫ్ట్ డిజైర్ కారును పోలీసులు స్వాధీనం చేసుకున్నారు. ఈ ఘటన రాష్ట్రవ్యాప్తంగా షాకింగ్ ట్విస్ట్లతో చర్చనీయాంశంగా మారింది. అరెస్ట్ అనంతరం పోలీసులు ప్రెస్మీట్ నిర్వహించి తేజేశ్వర్ హత్యకు సంబంధించిన వివరాలను వెల్లడించారు.
హత్య వెనుక కుట్ర
తేజేశ్వర్, గద్వాలలోని రాజవీధి నివాసి. ప్రైవేట్ సర్వేయర్గా, డాన్స్ టీచర్గా పనిచేస్తున్నాడు. కర్నూలుకు చెందిన ఐశ్వర్యతో మే 18న ప్రేమ వివాహం చేసుకున్నాడు. అయితే, వివాహానికి ముందు ఐశ్వర్య ఫిబ్రవరి 8న తిరుమల రావుతో కలిసి పరారై, ఫిబ్రవరి 15న తిరిగి ఇంటికి వచ్చింది. స్నేహితురాలి ఇంటికి వెళ్లినట్లు ఆమె చెప్పడంతో తేజేశ్వర్ నమ్మి, వివాహం చేసుకున్నాడు. అయితే, వివాహం తర్వాత ఐశ్వర్య తిరుమల రావుతో 2,000 కంటే ఎక్కువ సార్లు ఫోన్లో మాట్లాడింది. తిరుమల రావు, ఐశ్వర్య తల్లి సుజాతతో కూడా వివాహేతర సంబంధం కలిగి ఉన్నాడని, ఈ సంబంధాలను కొనసాగించేందుకు తేజేశ్వర్ను అడ్డంగా భావించి హత్యకు ప్లాన్ చేశారని పోలీసులు తెలిపారు.
హత్య జరిగిన విధానం
జూన్ 17న తేజేశ్వర్ను ఎర్రవల్లిలో 10 ఎకరాల భూమి సర్వే చేయాలన్న కారణంతో నిందితులు కారులో తీసుకెళ్లారు. వీరాపురం స్టేజ్ వద్ద జాతీయ రహదారి (NH-44) పక్కన కారులోనే తేజేశ్వర్పై కత్తితో దాడి చేసి, గొంతు కోసి హత్య చేశారు. ఆ తర్వాత, మృతదేహాన్ని కర్నూలు జిల్లాలోని పాణ్యం మండలంలోని సుగలిమెట్ట వద్ద హంద్రీ-నీవా సుజల శ్రావంతి (HNSS) కాలువలో పడేశారు. జూన్ 21న పోలీసులు మృతదేహాన్ని గుర్తించి, కర్నూలు ప్రభుత్వ ఆసుపత్రికి పోస్టుమార్టం కోసం తరలించారు. ఐశ్వర్య తేజేశ్వర్ బైక్కు జీపీఎస్ ట్రాకర్ అమర్చి, సుపారీ గ్యాంగ్కు అతని లొకేషన్ను తెలియజేసిందని, హత్యకు ముందు నాలుగు సార్లు హత్యాయత్నం విఫలమై, ఐదోసారి విజయవంతమైనట్లు పోలీసులు గుర్తించారు.
దర్యాప్తు ముమ్మరం..
గద్వాల టౌన్ పోలీస్ స్టేషన్లో తేజేశ్వర్ సోదరుడు తేజవర్ధన్ ఫిర్యాదు చేయడంతో జూన్ 18న మిస్సింగ్ కేసు నమోదైంది. సీసీటీవీ ఫుటేజ్, మొబైల్ లొకేషన్ డేటా, కాల్ రికార్డుల ఆధారంగా పోలీసులు దర్యాప్తు చేపట్టారు. ఐశ్వర్య, సుజాతలను జూన్ 19న అదుపులోకి తీసుకున్నారు, అయితే ఐశ్వర్య నాలుగు రోజుల తరువాత చివరకు నేరాన్ని అంగీకరించింది. తిరుమల రావును జూన్ 25న హైదరాబాద్లోని శంషాబాద్ విమానాశ్రయం సమీపంలో అరెస్టు చేశారు. సుపారీ హంతకులైన నాగేశ్, పరశురాం, రాజు, తిరుమల రావు డ్రైవర్, ఒక పొరుగువాడు (తేజేశ్వర్ కదలికలను ట్రాక్ చేసినవాడు) సహా ఎనిమిది మందిని అరెస్టు చేశారు. నిందితులు రూ.75,000 చొప్పున సుపారీ తీసుకున్నారని, తిరుమల రావు రూ.2 లక్షలు చెల్లించినట్లు పోలీసులు గుర్తించారు.
