బీఆర్ఎస్ (BRS) మాజీ మంత్రి, సిద్దిపేట ఎమ్మెల్యే తన్నీరు హరీశ్ రావు (Tanneeru Harish Rao) ఇంట తీవ్ర విషాదం చోటుచేసుకుంది. ఆయన తండ్రి (Father), తన్నీరు సత్యనారాయణ (Tanneeru Satyanarayana), ఈరోజు వేకువజామున తుదిశ్వాస విడిచారు. ఈ విషయం తెలుసుకున్న బీఆర్ఎస్ అధినేత కేసీఆర్(KCR), హరీశ్ రావుకు ఫోన్ చేసి పరామర్శించారు. తన బావతో ఉన్న అనుబంధాన్ని గుర్తుచేసుకుని, కుటుంబ సభ్యులను ఓదార్చి, ప్రగాఢ సానుభూతిని తెలియజేశారు.
తెలంగాణ ముఖ్యమంత్రి రేవంత్ రెడ్డి, ఉపముఖ్యమంత్రి భట్టి విక్రమార్క, రాష్ట్ర శాసన సభాపతి గడ్డం ప్రసాద్ కుమార్ సైతం సత్యనారాయణ మృతి పట్ల సంతాపం వ్యక్తం చేశారు. వారి ఆత్మకు శాంతి చేకూరాలని ప్రార్థిస్తూ, హరీష్ రావు కుటుంబానికి ప్రగాఢ సానుభూతిని తెలిపారు. సత్యనారాయణ పార్థివదేహాన్ని ప్రస్తుతం హైదరాబాద్‌ (Hyderabad)లోని క్రిన్స్‌ విల్లాస్‌ (Krins Villas)లో సందర్శనార్థం ఉంచగా, అంత్యక్రియలు ఈరోజు మధ్యాహ్నం ఫిల్మ్ నగర్ మహాప్రస్థానంలో జరగనున్నాయి.
