ప్ర‌పంచ కుబేరుడు ఎలాన్ మస్క్ (Elon Musk) గురి ఇప్పుడు ఇండియా (India)పై ప‌డింది. మస్క్ స్థాపించిన స్పేస్‌ఎక్స్ (SpaceX) కంపెనీకి చెందిన స్టార్‌లింక్ (Starlink), భారతదేశంలో సాటిలైట్ ఆధారిత బ్రాడ్‌బ్యాండ్ ఇంటర్నెట్ సేవలను అందించేందుకు ఇటీవల భారత ప్రభుత్వం (Indian Government) నుండి లైసెన్స్ (License) పొందింది. ఈ చర్య దేశంలో హై-స్పీడ్ ఇంటర్నెట్‌ను (High-Speed Internet), ముఖ్యంగా గ్రామీణ, మారుమూల ప్రాంతాలకు (Rural Remote Areas) అందుబాటులోకి తీసుకురావడానికి ఒక ముందడుగుగా అని కేంద్రం చెబుతోంది.
స్టార్‌లింక్ అంటే ఏమిటి?
స్టార్‌లింక్ అనేది స్పేస్‌ఎక్స్ సాటిలైట్ ఇంటర్నెట్ ప్రాజెక్ట్, ఇది లో-ఎర్త్ ఆర్బిట్ (LEO) లో వేలాది చిన్న ఉపగ్రహాలను ఉపయోగించి ప్రపంచవ్యాప్తంగా హై-స్పీడ్ ఇంటర్నెట్‌ను అందిస్తుంది. ఈ సాంకేతికత సాంప్రదాయ ఫైబర్ ఆప్టిక్ (Fiber Optic) లేదా టెలికాం టవర్ (Telecom Tower) ఆధారిత ఇంటర్నెట్ సేవలతో పోలిస్తే తక్కువ లాటెన్సీ, అధిక వేగాన్ని అందిస్తుంది. ముఖ్యంగా ఇంటర్నెట్ అందుబాటులో లేని ప్రాంతాలలో కూడా ఇది సేవలు అందించ‌గ‌ల‌దు.
భారత్‌లో స్టార్‌లింక్ లైసెన్స్
భారత ప్రభుత్వ టెలికమ్యూనికేషన్స్ విభాగం (DoT) స్టార్‌లింక్‌కు సాటిలైట్ కమ్యూనికేషన్ సేవలను అందించేందుకు అనుమతినిచ్చింది. ఈ లైసెన్స్ స్టార్‌లింక్‌కు దేశవ్యాప్తంగా, ముఖ్యంగా గ్రామీణ మరియు రిమోట్ ప్రాంతాలలో ఇంటర్నెట్ సేవలను అందించే అవకాశాన్ని కల్పిస్తుంది. స్టార్‌లింక్ రాక భారతదేశంలోని ఇంటర్నెట్ రంగంలో పెను మార్పులు తేనున్న‌ట్లుగా తెలుస్తోంది. స్టార్‌లింక్ సేవలు భారతదేశంలో పూర్తిస్థాయిలో ప్రారంభమైన తర్వాత, ఇది డిజిటల్ విప్లవానికి దోహదపడుతుందని భావిస్తున్నారు. ఇది భారతదేశంలో 5G మరియు ఇతర అధునాతన సాంకేతికతలతో కలిసి డిజిటల్ ఇన్‌ఫ్రాస్ట్రక్చర్‌ను బలోపేతం చేస్తుందని టెక్ దిగ్గ‌జాలు విశ్వ‌సిస్తున్నారు. రాబోయే సంవత్సరాల్లో స్టార్‌లింక్ ప్రభావం భారతదేశ డిజిటల్ ఆర్థిక వ్యవస్థపై ఎలా ఉంటుందో చూడటం ఆసక్తికరంగా మారింది.
