ఈనెల 15న జరిగే బిగ్బాస్ సీజన్ 8 ఫైనల్‌ కోసం పోలీసులు ప్రత్యేక చర్యలు చేపడుతున్నారు. జూబ్లీహిల్స్ రోడ్ నంబర్ 5లోని అన్నపూర్ణ స్టూడియోలో బీబీ-8 ఫైనల్‌ జరగనుంది. గత ఏడాది జరిగిన ఫైనల్‌ సమయంలో ఎదురైన అనేక సమస్యల కారణంగా, ఈసారి ఎలాంటి అవాంఛనీయ సంఘటనలు చోటుచేసుకోకుండా అన్ని ముందు జాగ్రత్తలు తీసుకుంటున్నారు.
గతంలో జరిగిన ఘటనల దృష్ట్యా ఈసారి స్టూడియో చుట్టూ 53 సీసీ కెమెరాలను ఏర్పాటు చేయాలని నిర్ణయించారు. జూబ్లీహిల్స్ పోలీసులు ఇప్పటికే కెమెరా ఏర్పాట్లకు సంబంధించిన పాయింట్లను బిగ్బాస్ యాజమాన్యానికి అందజేశారు. డిసెంబర్ 17న జరిగిన సీజన్ 7 ఫైనల్‌ సమయంలో అభిమానులు బస్సులపై రాళ్లు రువ్వడం, ఇతర అసాంఘిక కార్యకలాపాలకు పాల్పడిన సంఘటనలు జరిగిన విషయం తెలిసిందే. ఆ సమయంలో సీసీ కెమెరాలు లేకపోవడంతో పోలీసులు ఆందోళ‌న‌కారుల‌ను గుర్తించడంలో ఇబ్బందులు ఎదుర్కొన్నారు.
క‌ట్టుదిట్ట‌మైన భద్రతా చర్యలు
యూసుఫ్‌గూడ స్టేడియంలో ఇటీవల జరిగిన పుష్ప-2 ప్రీ రిలీజ్ ఫంక్షన్ అనుభవాలను తీసుకుని, ఈసారి మరింత బలమైన భద్రతా చర్యలు చేపట్టారు. ప్రీ రిలీజ్ ఫంక్షన్ సమయంలో భారీగా అభిమానులు రావడంతో చోరీలకు గురైన ఫోన్లు, బంగారు గొలుసులను గుర్తించేందుకు సీసీ కెమెరా ఫుటేజీలు సహాయపడ్డాయి.
ఈసారి బిగ్బాస్ ఫైనల్‌ సందర్భంగా ఎలాంటి అపశ్రుతులు జరగకుండా పోలీసులు ప్రత్యేక బందోబస్తు ఏర్పాటు చేయనున్నారు. అభిమానుల రద్దీకి అనుగుణంగా మరిన్ని చర్యలు తీసుకుంటూ, ప్రతి సందర్భంలో భద్రతకు ప్రాధాన్యత ఇస్తున్నారు.
