ప్రస్తుతం టాలీవుడ్‌లో మోస్ట్ వాంటెడ్ హీరోయిన్‌లలో ఆమె ఒకరు. సినీరంగంలో గుర్తింపు రావాలంటే అందం, అభినయం మాత్రమే కాదు.. కాసింత అదృష్టం కూడా ముఖ్యమని నిరూపిస్తోంది ఈ ముద్దుగుమ్మ. తెలుగులో ఆమె నటించిన తొలి సినిమా బాక్సాఫీస్ వద్ద అట్టర్ ప్లాప్ అయినప్పటికీ, ఈ బ్యూటీకి ఆఫర్స్ మాత్రం ఏమాత్రం తగ్గడం లేదు.
భాగ్యశ్రీ బోర్సేకు ఊహించని డిమాండ్
తెలుగు సినీరంగంలో ఇప్పుడిప్పుడే తమకంటూ గుర్తింపు తెచ్చుకుంటున్న హీరోయిన్‌లలో భాగ్యశ్రీ బోర్సే ఒకరు. రవితేజ నటించిన ‘మిస్టర్ బచ్చన్’ సినిమాతో ఈమె తెలుగు తెరకు పరిచయమైంది. సినిమా విడుదల కాకముందే తన అందంతో కుర్రకారుకు ఫేవరెట్ హీరోయిన్‌గా మారిపోయింది. దీంతో ‘మిస్టర్ బచ్చన్’ సినిమా సమయంలో ఈ అమ్మడి పేరు బాగా మారుమోగింది.
భారీ అంచనాల మధ్య విడుదలైన ఈ అమ్మడు మొదటి సినిమా బాక్సాఫీస్ వద్ద అట్టర్ ప్లాప్ అయ్యింది. కానీ, ఈ బ్యూటీ మాత్రం ప్రేక్షకులను ఆకట్టుకుని స్పెషల్ అట్రాక్షన్‌గా నిలిచింది. దీంతో తెలుగులో ఆమెకు వరుస అవకాశాలు క్యూ కట్టాయి. ప్రస్తుతం భాగ్యశ్రీ మలయాళీ స్టార్ హీరో దుల్కర్ సల్మాన్ సరసన ‘కాంత’ చిత్రంలో నటిస్తోంది.
స్టార్ హీరోల పక్కన అవకాశాలు
ఇంకా, రౌడీ హీరో విజయ్ దేవరకొండ జోడిగా ‘కింగ్ డమ్’ సినిమాలో భాగ్యశ్రీ నటిస్తోంది. ఈ మూవీ పోస్టర్లు ఇప్పటికే విడుదలై ఆకట్టుకున్నాయి. వీటితో పాటు రామ్ పోతినేని సరసన ఓ సినిమాలో కూడా నటిస్తుందని సమాచారం. ప్రస్తుతం ఈ అమ్మడి చేతిలో మొత్తం మూడు సినిమాలు ఉన్నాయని తెలుస్తోంది. అలాగే, తాజాగా మరో క్రేజీ ఛాన్స్ కొట్టేసిందని టాలీవుడ్ వర్గాల్లో టాక్ నడుస్తోంది.
అక్కినేని అఖిల్ ప్రధాన పాత్రలో, డైరెక్టర్ మురళీ కిశోర్ అబ్బూరు దర్శకత్వం వహిస్తున్న ‘లెనిన్’ సినిమాలో మొదట శ్రీలీల కథానాయికగా నటించాల్సి ఉంది. ఇప్పటికే విడుదలైన గ్లింప్స్ కూడా ఆకట్టుకుంది. అయితే, వరుస సినిమాలతో డేట్స్ సర్దుబాటు చేయలేక శ్రీలీల ఈ ప్రాజెక్ట్ నుంచి తప్పుకున్నట్లు తెలుస్తోంది. దీంతో ‘లెనిన్’ సినిమాకు కొత్త హీరోయిన్ కోసం మేకర్స్ వెతుకుతున్నారు. ఈ క్రమంలోనే అఖిల్ సరసన భాగ్యశ్రీ బోర్సేను సెలక్ట్ చేయాలని చిత్రయూనిట్ భావిస్తున్నట్లు ప్రచారం జరుగుతోంది. దీనిపై ఇప్పటివరకు ఎలాంటి అధికారిక ప్రకటన రాలేదు. ప్రస్తుతం భాగ్యశ్రీ ఇండస్ట్రీలో మోస్ట్ వాంటెడ్ హీరోయిన్‌గా మారింది.
