హిందూ ఆలయంపై దాడి తీవ్ర కలకలం రేపింది. బంగ్లాదేశ్‌లోని లక్ష్మీపూర్ జిల్లా, రాయ్‌పూర్ ప్రాంతం మురిహట్‌లో ఉన్న శ్రీశ్రీ మహామాయ దేవాలయంలో ముసుగులతో ధరించిన దుండగులు విగ్రహాన్ని ధ్వంసం చేశారు. హోలీ పండగ సందర్భంగా ఈ ఘటన చోటుచేసుకోవడం అక్కడి హిందూ మైనారిటీ ప్రజల్లో భయాందోళనలకు గురిచేసింది.
CCTV ఫుటేజ్ లో దొరికిన ఆధారాలు
హోలీ పండగ రోజు పూజా కార్య‌క్ర‌మాలు ముగిసిన అనంతరం ఆలయ పూజారులు వెళ్లిపోయారు. ఆ తర్వాతే ఈ దాడి జరిగింది. శ‌నివారం తిరిగి ఆలయానికి వచ్చిన పూజారి, విగ్రహం ధ్వంసం అయిన దృశ్యం చూసి షాక్‌కు గురయ్యారు. వెంటనే ఈ విషయాన్ని స్థానిక హిందూ సంఘానికి తెలియజేశారు. ఆలయంలో ఏర్పాటు చేసిన CCTV కెమెరాల్లో ముసుగు ధరించిన వ్యక్తి ఆలయ ప్రాంగణంలోకి ప్రవేశించి, విగ్రహాన్ని ధ్వంసం చేసి పారిపోతున్న దృశ్యాలు రికార్డయ్యాయి.
నిందితుల అరెస్ట్ డిమాండ్
ఈ ఘటనపై ఆలయ కమిటీ ప్రధాన కార్యదర్శి విశ్వనాథ్ సాహా పోలీస్ స్టేషన్లో ఫిర్యాదు చేశారు. నిందితులను 24 గంటల్లోపే అరెస్ట్ చేయాలని లక్ష్మీపూర్ పూజ ఉత్సవ్ పరిషత్ డిమాండ్ చేసింది. ఈ నేపథ్యంలో రాయ్‌పూర్ పోలీస్ స్టేషన్ ఇన్‌ఛార్జి నిజాం ఉద్దీన్ భూయాన్ సంఘటనా స్థలాన్ని సందర్శించి, కేసు నమోదు చేసి దర్యాప్తు ప్రారంభించారు.
