‘రెండేళ్లు ఓపిక ప‌ట్టా.. ఇక నావ‌ల్ల కాదు’ – ఒంగోలులో బాలినేని సంచ‌ల‌నం

ప్రకాశం జిల్లా రాజకీయాల్లో తాజా ప‌రిణామాలు చర్చనీయాంశంగా మారాయి. మాజీ మంత్రి బాలినేని శ్రీ‌నివాసులు రెడ్డి (Balineni Srinivasa Reddy) వివాదాస్ప‌ద వ్యాఖ్య‌ల‌తో వార్త‌ల్లో నిలుస్తున్నారు. ఒంగోలులో (Ongole) తెలుగుదేశం పార్టీ (Telugu Desam Party), వైసీపీ (YSRCP) కలిసి పనిచేస్తున్నాయంటూ జ‌న‌సేన నేత బాలినేని చేసిన ఆరోపణలు తీవ్ర చ‌ర్చ‌నీయాంశంగా మారాయి. ఇందులో అసలు ఉద్దేశాలు ఏమిటో ప్రజలకు చెప్పాలని ఆయన డిమాండ్ చేశారు. ఎవరు ఎవరితో కలిసినా తనను ఎవరూ ఏమి చేయలేరని స్పష్టం చేశారు.

కూటమిలో భాగంగా ఉన్నామని, కూట‌మి ఒప్పందం ప్ర‌కారం గత రెండు సంవత్సరాలుగా ఓపిక పట్టానని, ఇక నుంచి మౌనం వహించబోనని బాలినేని హెచ్చరించారు. తనకు పార్టీ కంటే ప్రజలే ముఖ్యమని వ్యాఖ్యానించారు. ఒంగోలులో జరుగుతున్న పరిణామాలపై ముఖ్యమంత్రి చంద్ర‌బాబు నాయుడు (Nara Chandrababu Naidu) స్వయంగా ఆరా తీయాలని సూచించారు.

తాను జనసేనలో (Jana Sena Party) చేరడంపై వస్తున్న విమర్శలను కూడా బాలినేని ఖండించారు. దోచుకున్నది దాచుకోవడానికే పార్టీ మారారని కొందరు చేస్తున్న ఆరోపణలు పూర్తిగా అవాస్తవమని తెలిపారు. కేసులకు భయపడే వ్యక్తిని తాను కాదని, రాజకీయంగా ఎదుర్కొనే ధైర్యం ఉందని స్పష్టం చేశారు.

ఇక టీడీపీ ఎమ్మెల్యే దామచర్ల జనార్ధన్‌కు బాలినేని సవాల్ విసిరారు. ఎవరి హయాంలో అవినీతి జరిగిందో బహిరంగంగా తేల్చుకుందామని చెప్పారు. ప్రజల ముందే నిజాలు బయటపెట్టేందుకు తాను సిద్ధమని వెల్లడించారు. ఈ వ్యాఖ్యలతో ఒంగోలు రాజకీయాలు మరింత వేడెక్కే అవకాశముంది. బాలినేని వ్యాఖ్యలకు టీడీపీ నేతలు ఎలా స్పందిస్తారన్నది ఇప్పుడు ఆసక్తికరంగా మారింది. జిల్లా రాజకీయ సమీకరణాలు రాబోయే రోజుల్లో కొత్త మలుపు తిరిగే అవకాశం ఉందని రాజకీయ విశ్లేషకులు భావిస్తున్నారు.