సన్‌రైజర్స్ హైదరాబాద్ (SRH) జట్టు యజమాని కావ్యా మారన్ (Kavya Maran) గురించి ఒక ఆస‌క్తిక‌ర విష‌యం కోలీవుడ్‌ (Kollywood)లో చ‌క్క‌ర్లు కొడుతోంది. ప్రముఖ మ్యూజిక్ డైరెక్ట‌ర్‌, సింగ‌ర్‌ అనిరుధ్ రవిచందర్ (Anirudh Ravichander)తో ఆమె త్వరలో పెళ్లిపీట‌లు (Wedding Stage) ఎక్క‌నున్న‌ట్లుగా వార్తలు సోషల్ మీడియాలో తెగ హల్‌చల్ చేస్తున్నాయి. ఈ జంట గతేడాది కాలంగా రిలేషన్‌షిప్‌లో ఉందని, త్వరలోనే వివాహానికి సిద్ధమవుతోందని రెడిట్‌లో వైరల్ అయిన ఓ పోస్ట్ సంచలనం సృష్టించింది. అయితే, ఈ వార్తలపై ఇంకా అధికారిక ప్రకటన రాకపోవడంతో అభిమానుల్లో స‌స్పెన్స్ నెల‌కొంది.
రజనీకాంత్ పాత్రతో ఊహాగానాలు
ఈ రూమ‌ర్స్‌కు మరింత బలం చేకూర్చిన అంశం ఏమిటంటే, సూపర్‌స్టార్ రజనీకాంత్ కావ్య తండ్రి, సన్ గ్రూప్ చైర్మన్ కళానిధి మారన్‌తో ఈ విషయమై చర్చలు జరిపినట్లు సమాచారం. అనిరుధ్‌కు రజనీకాంత్ ఎంతో సన్నిహితుడు కావడం, ఇద్దరి కుటుంబాలూ తమిళనాడులోని మీడియా, ఎంటర్‌టైన్‌మెంట్ రంగాల్లో బలమైన పాత్ర పోషిస్తుండటం ఈ ఊహాగానాలకు ఆజ్యం పోస్తున్నాయి. రెడిట్ పోస్ట్‌లో “రజనీకాంత్ స్వయంగా కళానిధి మారన్‌తో మాట్లాడి, ఈ జంట వివాహం త్వరలో జరగవచ్చని” పేర్కొనడంతో అభిమానులు ఉత్సాహంగా కామెంట్లు పోస్టు చేస్తున్నారు.
కావ్యా-అనిరుధ్: రియల్ లైఫ్ రాక్‌స్టార్స్?
33 ఏళ్ల కావ్యా మారన్, సన్ గ్రూప్‌కు చెందిన సన్ టీవీ నెట్‌వర్క్ ఎగ్జిక్యూటివ్ డైరెక్టర్‌గా, SRH జట్టు నిర్వహణలో కీలక పాత్ర పోషిస్తోంది. ఐపీఎల్ మ్యాచ్‌ల సమయంలో ఆమె ఉత్సాహంగా జట్టును ప్రోత్సహించడం, ఆమె రియాక్షన్స్ సోషల్ మీడియాలో వైరల్ అవడం సర్వసాధారణం. మరోవైపు, 34 ఏళ్ల అనిరుధ్ రవిచందర్ ‘వై దిస్ కొలవెరి డి’ వంటి హిట్ పాటలతో దేశవ్యాప్తంగా పేరు తెచ్చుకున్న సంగీత దర్శకుడు. షారుఖ్ ఖాన్ ‘జవాన్’, రజనీకాంత్ ‘జైలర్’ వంటి బ్లాక్‌బస్టర్ చిత్రాలకు సంగీతం అందించిన అనిరుధ్, దక్షిణ భారత సినీ పరిశ్రమలో అగ్రశ్రేణి సంగీత దర్శకుడిగా రాణిస్తున్నాడు.
సోషల్ మీడియాలో వైరల్ అవుతున్న రెడిట్ పోస్ట్‌లో “అనిరుధ్, కావ్య గత ఏడాది నుంచి డేటింగ్‌లో ఉన్నారు, వారి వివాహ ప్రణాళికలు కూడా ప్రారంభమయ్యాయి” అని పేర్కొనగా, కొందరు నెటిజన్లు “వీరిద్దరూ రెస్టారెంట్లలో కలిసి కనిపించారని” కామెంట్లు చేశారు. అయితే, గతంలో అనిరుధ్ టీమ్ ఈ డేటింగ్ వార్తలను ఖండిస్తూ, వీరిద్దరూ మంచి స్నేహితులు మాత్రమేనని స్పష్టం చేసింది.
