తమిళనాడు (Tamil Nadu) రాజకీయాల్లో (Politics) ఆసక్తికర పరిణామం చోటుచేసుకోబోతోంది. దక్షిణ భారత సినిమా పరిశ్రమలో ప్రముఖ నటిగా గుర్తింపు పొందిన నటి (Actress) మీనా (Meena) త్వరలో భారతీయ జనతా పార్టీ (బీజేపీ)(BJP)లో చేరనున్నట్లు సమాచారం. ఈ విషయంపై బీజేపీ నాయకత్వం చర్చలు పూర్తి చేసినట్లు తెలుస్తోంది, త్వరలోనే అధికారిక ప్రకటన వెలువడే అవకాశం ఉందన్న ఊహాగానాలు తమిళ రాజకీయాల్లో ఊపందుకున్నాయి. 2026లో జరగనున్న తమిళనాడు అసెంబ్లీ ఎన్నికల నేపథ్యంలో ఈ పరిణామం రాజకీయ వర్గాల్లో హాట్ టాపిక్‌గా మారింది.
ఉపరాష్ట్రపతి సమావేశం, ఊహాగానాలకు బలం
ఇటీవల నటి మీనా ఢిల్లీ (Delhi)లో భారత ఉపరాష్ట్రపతి (Indian Vice President) జగదీప్ ధన్‌ఖడ్‌ (Jagdeep Dhankhar)ను మర్యాదపూర్వకంగా కలిశారు. ఈ సమావేశానికి సంబంధించిన ఫోటోలను ఆమె ఇన్‌స్టాగ్రామ్‌లో పోస్ట్ చేస్తూ, “ఉపరాష్ట్రపతి జగదీప్ ధన్‌ఖడ్‌ని కలవడం గౌరవంగా భావిస్తున్నాను. ఈ సమావేశం నాకు చాలా ప్రేరణనిచ్చింది, భవిష్యత్తులో నా ప్రయాణానికి దిశానిర్దేశం చేస్తుందని నమ్ముతున్నాను” అని రాశారు. ఈ పోస్ట్ సోషల్ మీడియాలో వైరల్ కావడంతో, మీనా బీజేపీలో చేరే అవకాశం ఉందన్న ఊహాగానాలు మరింత బలపడ్డాయి.
బీజేపీలో సినీ తారల ఆకర్షణ
తమిళనాడు (Tamil Nadu)లో సినిమా-రాజకీయాల మధ్య ఎప్పటి నుంచో బ‌ల‌మైన సంబంధం ఉంది. ఎంజీఆర్, జయలలిత వంటి సినీ దిగ్గజాలు రాజకీయంగా విజయం సాధించిన చరిత్ర ఉంది. ఇప్పటికే బీజేపీలో నటి ఖుష్బూ సుందర్, రాధిక శరత్‌కుమార్, కొరియోగ్రాఫర్ కలా మాస్టర్ వంటి సినీ ప్రముఖులు స‌భ్యులుగా కొన‌సాగుతున్నారు. మీనా కూడా ఈ జాబితాలో చేరితే, బీజేపీకి మరో స్టార్ ఫేస్ లభించినట్లు అవుతుందని రాజకీయ విశ్లేషకులు భావిస్తున్నారు. మీనా గతంలో ఢిల్లీలో కేంద్ర రాష్ట్ర మంత్రి ఎల్. మురుగన్ నివాసంలో జరిగిన పొంగల్ వేడుకలకు హాజరైనప్పుడు కూడా ఆమె రాజకీయ ఆసక్తిపై చర్చలు జరిగాయి, అయితే ఆ సమయంలో ఆమె బీజేపీలో చేరే వార్తలను ఖండించారు.
మీనా రాజకీయ ప్రవేశం..
2026 తమిళనాడు అసెంబ్లీ ఎన్నికలను దృష్టిలో పెట్టుకుని, బీజేపీ ప్రముఖ వ్యక్తులను పార్టీలోకి ఆకర్షించే వ్యూహంలో భాగంగా మీనా పేరు పరిగణనలో ఉన్నట్లు సమాచారం. కొందరు సీనియర్ జర్నలిస్టులు ఆమెను కేంద్ర రాష్ట్ర మంత్రిగా నియమించే అవకాశం ఉందని అంచనా వేస్తున్నారు. అయితే, ఈ విషయంపై మీనా లేదా బీజేపీ నుంచి ఇంతవరకు అధికారిక స్పందన రాలేదు. మీనా నాలుగు దశాబ్దాలకు పైగా తమిళ, తెలుగు, మలయాళ, కన్నడ చిత్రాల్లో నటించి, భారీ అభిమాన గణాన్ని సంపాదించుకున్నారు. ఆమె రాజకీయ ప్రవేశం బీజేపీకి తమిళనాడులో బలాన్ని పెంచే అవకాశం ఉందని, అదే సమయంలో డీఎంకే, ఏఐఏడీఎంకేలతో పోటీని మరింత తీవ్రతరం చేస్తుందని విశ్లేషకులు అభిప్రాయపడుతున్నారు.
