నితేష్ తివారీ దర్శకత్వంలో తెరకెక్కిన మోస్ట్ అవైటెడ్ మూవీ ‘రామాయణం’ థియేటర్లలో సందడి చేస్తోంది. తొలి షో చూసిన ప్రేక్షకులు ఎక్స్ (ట్విట్టర్) వేదికగా తమ ఫస్ట్ రియాక్షన్స్‌ను పంచుకుంటున్నారు. సినిమా భారీ స్కేల్, విజువల్ ఎఫెక్ట్స్ (VFX), నటీనటుల పెర్ఫార్మెన్స్, సంగీతంపై ప్రశంసలు కురిపిస్తున్నారు. ముఖ్యంగా రాముడిగా రణబీర్ కపూర్, రావణాసురుడిగా యాష్ నటన సినిమాకు ప్రధాన ఆకర్షణగా నిలిచాయని చెబుతున్నారు.
సోషల్ మీడియాలో వస్తున్న స్పందనల ప్రకారం.. హాలీవుడ్ స్థాయి ప్రొడక్షన్ క్వాలిటీతో విజువల్స్ అద్భుతంగా ఉన్నాయని ప్రేక్షకులు అభిప్రాయపడుతున్నారు. శ్రీరాముడి పాత్రలో రణబీర్ కపూర్ ఎలా మెప్పిస్తాడనే సందేహాలకు తన నటనతో సమాధానం చెప్పాడని ఫ్యాన్స్ అంటున్నారు. కథ ముందుకు సాగుతున్న కొద్దీ రాముడి పాత్రలో రణబీర్ చక్కగా ఒదిగిపోయాడని ప్రశంసిస్తున్నారు. మరోవైపు రావణుడిగా యాష్ తన పవర్‌ఫుల్ స్క్రీన్ ప్రెజెన్స్‌తో ఆకట్టుకున్నాడని, ముఖ్యంగా జటాయువు సీక్వెన్స్‌లో ఆయన నటన, ఫైట్స్, గ్రాఫిక్స్ ప్రేక్షకులను విశేషంగా మెప్పించాయని రియాక్షన్స్ వస్తున్నాయి.
సీతగా సాయి పల్లవి, లక్ష్మణుడిగా రవి దూబే, దశరథుడిగా అరుణ్ గోవిల్ తమ పాత్రలకు న్యాయం చేశారని ప్రేక్షకులు చెబుతున్నారు. అయితే రాముడు, సీత మధ్య భావోద్వేగ అనుబంధం మరింత బలంగా చూపించి ఉంటే బాగుండేదనే అభిప్రాయాలు కూడా వ్యక్తమవుతున్నాయి. కథ పరిచయం, నేపథ్య సన్నివేశాల కారణంగా సుమారు 3 గంటల 15 నిమిషాల నిడివి కొంత నెమ్మదిగా అనిపించినప్పటికీ, విజువల్ గ్రాండియర్ ప్రేక్షకులను ఆకట్టుకుంటోందని పలువురు పేర్కొంటున్నారు.
హన్స్ జిమ్మర్, ఎ.ఆర్. రెహమాన్ అందించిన సంగీతం సినిమాకు ప్రత్యేక ఆకర్షణగా నిలిచిందని సోషల్ మీడియా రియాక్షన్స్‌లో పేర్కొంటున్నారు. ముఖ్యంగా హన్స్ జిమ్మర్ బ్యాక్‌గ్రౌండ్ స్కోర్ అద్భుతంగా ఉందని, ఈ విజువల్ వండర్‌ను ఐమాక్స్ థియేటర్లలో చూడాలని ప్రేక్షకులు సూచిస్తున్నారు. నమిత్ మల్హోత్రా, యాష్ నిర్మించిన రెండు భాగాల ఈ ఎపిక్ చిత్రంలో మొదటి భాగంపై వస్తున్న స్పందనతో రెండో భాగంపై అంచనాలు పెరిగాయి. ముఖ్యంగా హనుమంతుడి పాత్రలో సన్నీ డియోల్ ఎలా కనిపించనున్నారనే ఆసక్తి ప్రేక్షకుల్లో నెలకొంది.
