స్థానిక సంస్థల ఎన్నికల (Local Body Elections) నామినేషన్ల (Nominations) పర్వం సాక్షిగా అధికార తెలుగుదేశం పార్టీ (Telugu Desam Party) శ్రేణుల దాడులు ఏ స్థాయిలో ఉన్నాయో చెప్పడానికి వైఎస్సార్ జిల్లా చాపాడు మండలంలో జరిగిన ఘటనే నిదర్శనం. ప్రజాస్వామ్య పద్ధతిలో నామినేషన్ దాఖలు చేయడానికి వచ్చిన ఒకరు 9 నెలల గర్భవతి అని కూడా చూడకుండా టీడీపీ(TDP) మూకలు క‌ర్క‌శంగా వ్యవహరించాయి. మహిళపై భౌతిక దాడికి దిగి, నామినేషన్ పత్రాలను బలవంతంగా లాక్కుని చించివేసిన ఈ హేయమైన ఘటన రాష్ట్రవ్యాప్తంగా తీవ్ర సంచలనం సృష్టిస్తోంది.
వైఎస్సార్ జిల్లా(YSR Kadapa District) చాపాడు మండలంలోని వెదురూరు ఎంపీటీసి(MPTC) స్థానానికి వైసీపీ తరఫున నామినేషన్ దాఖలు చేసేందుకు అభ్యర్థి నందిమండలం ప్రశాంతి (Nandimandalam Prashanthi) తన కుటుంబ సభ్యులు, బంధువులతో కలిసి నిబంధనల ప్రకారం నామినేషన్ కేంద్రానికి బయలుదేరారు.
తొమ్మిది నెలల నిండు గర్భిణీ అని కనీస మానవత్వం కూడా చూపకుండా టీడీపీ(TDP) శ్రేణులు ఆమెను అడ్డుకున్నాయి. ప్రశాంతితో పాటు వచ్చిన బంధువులపై విచక్షణారహితంగా దాడికి దిగి, చేతిలోని నామినేషన్ పత్రాలను బలవంతంగా లాక్కుని ముక్కలుముక్కలుగా చించివేశారు.
నామినేషన్ కేంద్రం వద్ద అభ్యర్థులకు కనీసం రక్షణ కల్పించడంలో, తగిన పోలీసు బందోబస్తు ఏర్పాటు చేయడంలో పూర్తిగా విఫలమైన పోలీసులు.. ఈ దారుణాన్ని చూస్తూ ప్రేక్షకపాత్ర పోషించారని వైసీపీ అభ్యర్థి, 9 నెలల గర్భిణీ ప్రశాంతి ఆవేద‌న వ్య‌క్తం చేశారు.
చుట్టుపక్కల మండలాల్లోనూ అదే తంతు
కేవలం వెదురూరు మాత్రమే కాకుండా చాపాడు మండలంలోని నక్కలదిన్నె, అల్లాడుపల్లె తదితర ఎంపీటీసీ స్థానాలకు నామినేషన్లు వేసేందుకు వస్తున్న వైసీపీ అభ్యర్థులను సైతం టీడీపీ శ్రేణులు అడుగడుగునా అడ్డుకున్నాయని అభ్య‌ర్థులు ఆగ్ర‌హం వ్య‌క్తం చేస్తున్నారు. ప్రతిపక్షం అసలు నామినేషన్లు వేయకుండా భయభ్రాంతులకు గురిచేయడమే లక్ష్యంగా అధికార పార్టీ ఈ అణచివేత రాజకీయాలకు తెరలేపిందని మండిప‌డుతున్నారు.
రాష్ట్రంలో శాంతిభద్రతలు పూర్తిగా దిగజారిపోయాయని, గర్భిణీ మహిళలని కూడా చూడకుండా దాడులకు తెగబడుతున్న కూటమి మూకల అరాచకాలను రాష్ట్ర ప్రజలు, న్యాయస్థానాలు గమనించాలని బాధితులు, వైసీపీ శ్రేణులు డిమాండ్ చేస్తున్నాయి.
