సమాచారం అనేది ప్రస్తుత ప్రపంచంలో ప్రతి ఒక్కరికీ అత్యవసరం. ఆ సమాచారాన్ని సేకరించి ప్రజలకు అందించడానికి మీడియా సంస్థలు, ప్రతినిధులు ఒక వారధిలా నిలుస్తారు. సరిహద్దుల్లో సైనికుడు శత్రవుతో పోరాడేటప్పుడు ఎలాంటి లెక్కలుంటాయో.. ఓ నిజమైన వార్తను సమాజం ముందుకు తీసుకురావడానికి వెళ్లే జర్నలిస్టు కూడా తన జీవితాన్నే పణంగా పెడతాడు. తెరపై కనిపించే కొద్ది నిమిషాల సమాచారం వెనుక జర్నలిస్టులు పడుతున్న కష్టాలు, వారి జీవితానుభవాలను అత్యద్భుతంగా ఆవిష్కరించిన చిత్రమే ‘రిపోర్టింగ్ లైవ్’ (Reporting Live).
నెట్‌ఫ్లిక్స్ (Netflix) వేదికగా స్ట్రీమ్ అవుతున్న ఈ సినిమా ప్రేక్షకులను కట్టిపడేయడమే కాకుండా, సినిమా చూస్తున్నంతసేపు ప్రతి ఒక్కరినీ ఓ రిపోర్టర్‌లా మారిపోయేలా తీవ్రంగా ప్రభావితం చేస్తుంది. అంతలా ఆకట్టుకుంటున్న ఈ చిత్ర కథాంశం ఏంటో ఒకసారి చూద్దాం.
కథేమిటంటే..?
ఓ ప్రముఖ న్యూస్ ఛానెల్‌లో పనిచేసే జర్నలిస్ట్ సంధ్యా యాదవ్ (Sandhya Yadav) (పరిణీతి చోప్రా)(Parineeti Chopra), తన కెమెరామెన్ వినోద్ శర్మతో(Vinod Sharma) కలిసి మహారాష్ట్రలో జరిగిన ఓ ఘోర బస్సు ప్రమాదాన్ని కవర్ చేయడానికి వెళ్తుంది. బ్రిడ్జి కూలిపోవడం వల్ల జరిగిన ఈ ప్రమాదంలో బస్సు(Bus) నీట మునగడంతో.. డ్రైవర్, ఉపాధ్యాయులతో పాటు చాలా వరకు చిన్నారులంతా ప్రాణాలు కోల్పోతారు.
ఈ విషాద ఘటనను కవర్ చేసే క్రమంలో ఆ బ్రిడ్జి నాణ్యతా లోపం వల్లే కూలిపోయిందని, దాని వెనుక స్థానిక ఇసుక మాఫియా అక్రమ దందాలే ప్రధాన కారణమని సంధ్య పరిశోధనలో తేలుతుంది. దీంతో వినోద్‌తో కలిసి ఈ ప్రమాదానికి సంబంధించి ఎన్నో కీలకమైన ఆధారాలను ఆమె సేకరిస్తుంది. మరి సంధ్యా సేకరించిన ఈ సంచలన వార్తను ఆమె పనిచేస్తున్న సంస్థ ప్రసారం చేసిందా? ఆ ఇసుక మాఫియాను ఎదిరించే క్రమంలో సంధ్యకు, వినోద్‌కు ఎలాంటి ప్రాణాపాయ అవరోధాలు ఎదురయ్యాయి? అన్నదే ఈ చిత్ర అసలు కథ. దీన్ని తెలుసుకోవాలంటే నెట్‌ఫ్లిక్స్‌లో ‘రిపోర్టింగ్ లైవ్’ సినిమా చూడాల్సిందే.
నటీనటులు, సాంకేతిక నిపుణుల ప్రతిభ
- జర్నలిస్ట్ సంధ్యా యాదవ్ పాత్రలో పరిణీతి చోప్రా జీవించేశారు. రిపోర్టర్ పాత్రలో ఆమె చూపిన హావభావాలు, ఒత్తిడిని ఎదుర్కొనే తీరు, నిజం కోసం పోరాడే ధైర్యం ప్రేక్షకులను కట్టిపడేస్తాయి.
- బాలీవుడ్ రచయితలు ధృవ్ త్రిపాఠి(Dhruv Tripathi), మిహిర్ జాదవ్ (Mihir Jadhav) సంయుక్తంగా అందించిన కథకు, ధృవ్ త్రిపాఠి దర్శకత్వం ప్రాణం పోశారు. ఎక్కడా బోర్ కొట్టించకుండా ఉత్కంఠభరితంగా కథను నడిపించిన తీరు ప్రశంసనీయం.
- రోజూ మనం టీవీల్లో చూసే వార్తల వెనుక జర్నలిస్టులు పడుతున్న కష్టాలు, ఎదుర్కొంటున్న ప్రాణభయాలను కళ్లకు కట్టినట్లు చూపించిన చిత్రం ఇది. ప్రస్తుత మీడియా పోకడలకు ఈ సినిమా అద్దం పడుతుంది. ఈ వీకెండ్‌లో తప్పక చూడదగ్గ అరుదైన చిత్రమిది.
