తెలంగాణ శాసనసభ ప్రాంగణంలో సోమవారం చోటుచేసుకున్న ఉద్రిక్త పరిణామాలు రాష్ట్ర రాజకీయాల్లో తీవ్ర చర్చకు దారితీశాయి. అసెంబ్లీ ముట్టడి, విధుల్లో ఉన్న అధికారులతో బీఆర్ఎస్ నేతల వాగ్వాదం, స్పీకర్ గడ్డం ప్రసాద్ పట్ల అనుచితంగా ప్రవర్తించారన్న ఆరోపణల నేపథ్యంలో అధికార, ప్రతిపక్ష పార్టీల మధ్య మాటల యుద్ధం ముదిరింది. ఈ పరిణామాలపై తీవ్ర మనస్తాపానికి గురైన స్పీకర్ గడ్డం ప్రసాద్ సభలో భావోద్వేగానికి లోనై కంటతడి పెట్టడం చర్చనీయాంశంగా మారింది. సభా మర్యాదలు, ప్రజాస్వామ్య విలువలను కాపాడాల్సిన బాధ్యత ప్రతి ప్రజాప్రతినిధిపైనా ఉందని పలువురు నేతలు పేర్కొన్నారు.
ఈ నేపథ్యంలో మంగళవారం అసెంబ్లీకి వచ్చిన ముఖ్యమంత్రి రేవంత్ రెడ్డి, ఉపముఖ్యమంత్రి భట్టి విక్రమార్క నేరుగా స్పీకర్ ఛాంబర్కు వెళ్లి గడ్డం ప్రసాద్ను పరామర్శించారు. జరిగిన పరిణామాలపై ఆయనకు తమ పూర్తి మద్దతు తెలిపారు. రాజ్యాంగబద్ధమైన స్పీకర్ పదవికి భంగం కలిగించేలా ఎవరైనా వ్యవహరిస్తే, వారు ఎంతటి వారైనా చట్టప్రకారం చర్యలు తీసుకుంటామని ప్రభుత్వం స్పష్టం చేసింది. అసెంబ్లీ ప్రాంగణంలో చోటుచేసుకున్న ఘటనలపై ఇప్పటికే రాజకీయ వర్గాల్లో తీవ్ర చర్చ జరుగుతుండగా, బాధ్యులపై చట్టపరమైన చర్యలు తీసుకునే అంశంపై ప్రభుత్వం దృష్టి సారించినట్లు తెలుస్తోంది.
