పార్లమెంట్ వర్షాకాల సమావేశాల (Parliament Monsoon Session) తొలి రోజే దేశ రాజధాని ఢిల్లీ (Delhi) ఉద్రిక్తంగా మారింది. నీట్ ప్రశ్నపత్రాల లీక్(NEET Question Paper Leak), పోటీ పరీక్షల్లో అక్రమాలు, పెరుగుతున్న నిరుద్యోగంపై (Unemployment) కాక్రోచ్ జనతా పార్టీ (CJP) చేపట్టిన ‘సంసద్ ఛలో’ ఉద్యమం (Sansad Chalo Protest) భారీగా ఊపందుకుంది. జంతర్ మంతర్ (Jantar Mantar) నుంచి వేలాది మంది విద్యార్థులు, పోటీ పరీక్షల అభ్యర్థులు, వారి తల్లిదండ్రులు పార్లమెంట్ వైపు ర్యాలీగా కదలడంతో పోలీసులు భారీ భద్రత ఏర్పాటు చేశారు. నిరసనకారులు విజయ్ చౌక్, రైల్ భవన్ ప్రాంతాలకు చేరుకోవడంతో వారిని అడ్డుకునేందుకు పోలీసులు టియర్ గ్యాస్ (Tear Gas) ప్రయోగించగా, అల్లర్ల నిరోధక దళాలు, సీఆర్పీఎఫ్(CRPF), పారామిలిటరీ బలగాలు రంగంలోకి దిగాయి. భద్రతా కారణాల దృష్ట్యా పార్లమెంట్కు వెళ్లే కీలక ప్రవేశ మార్గాలను తాత్కాలికంగా మూసివేశారు.
పోలీసుల హెచ్చరికలు, టియర్ గ్యాస్ ప్రయోగం జరిగినప్పటికీ నిరసనకారులు పార్లమెంట్ సమీప ప్రాంతాల వరకు చేరుకోవడం భద్రతా సంస్థలను అప్రమత్తం చేసింది. పరిస్థితిని అదుపులోకి తీసుకురావడానికి ఢిల్లీ పోలీసులు రాజధానిలో మూడు అంచెల భద్రతా వ్యవస్థను అమలు చేశారు. జంతర్ మంతర్, పార్లమెంట్ స్ట్రీట్, సెంట్రల్ విస్టా, కన్నాట్ ప్లేస్ తదితర ప్రాంతాల్లో భారీగా భద్రతా బలగాలను మోహరించగా, అత్యవసర పరిస్థితులను ఎదుర్కొనేందుకు ప్రత్యేక స్పందన బృందాలను కూడా సిద్ధంగా ఉంచారు. పార్లమెంట్ పరిసరాలను పూర్తిగా భద్రతా వలయంలోకి తీసుకుని అధికారులు నిరంతరం పరిస్థితిని పర్యవేక్షిస్తున్నారు.
ఇక CJP మూడు ప్రధాన డిమాండ్లతో ఉద్యమాన్ని కొనసాగిస్తోంది. NEET సహా పోటీ పరీక్షల ప్రశ్నపత్రాల లీకులపై నిష్పక్షపాత విచారణ, కేంద్ర విద్యాశాఖ మంత్రి ధర్మేంద్ర ప్రధాన్ రాజీనామా(Resignation), నిరుద్యోగం మరియు ప్రభుత్వ ఉద్యోగాల భర్తీలో జాప్యంపై తక్షణ చర్యలు తీసుకోవాలని పార్టీ డిమాండ్ చేస్తోంది. ఇదే సమయంలో కేంద్ర విద్యాశాఖ మంత్రి ధర్మేంద్ర ప్రధాన్(Dharmendra Pradhan), కేంద్ర హోంమంత్రి అమిత్ షాతో భేటీ కావడం రాజకీయంగా చర్చనీయాంశమైంది. మరోవైపు ప్రభుత్వం తమతో చర్చలకు సిద్ధమైందని CJP ప్రకటించగా, కేంద్ర మంత్రి జేపీ నడ్డా (JP Nadda) మాత్రం అలాంటి చర్చలు జరగవని స్పష్టం చేశారు. దీంతో పరిస్థితి మరింత ఉత్కంఠగా మారగా, పార్లమెంట్ సమావేశాల నేపథ్యంలో ఢిల్లీలో రాజకీయ వేడి ఒక్కసారిగా పెరిగింది.
