ప్రఖ్యాత నేపథ్య గాయని (Singer) ఎస్. జానకి(S.Janaki) మరణంపై మెగాస్టార్ చిరంజీవి (Megastar Chiranjeevi) తీవ్ర దిగ్భ్రాంతి వ్యక్తం చేశారు. జానకి మరణవార్త తన హృదయాన్ని ఎంతో కలచివేసిందని పేర్కొంటూ, ఆమెకు సోషల్ మీడియా వేదికగా భావోద్వేగ నివాళి అర్పించారు.
జానకితో తనకు ఉన్న అనుబంధాన్ని గుర్తు చేసుకున్న చిరంజీవి.. తన సినీ ప్రయాణంలో (Film Journey) ఎన్నో మరపురాని పాటలకు (Unforgettable Songs) ఆమె అపురూపమైన గాత్రాన్ని అందించారని తెలిపారు. తాము తెరపై పలికించిన ఎన్నో భావోద్వేగాలకు ప్రాణం పోసింది జానకి స్వరమేనని పేర్కొన్నారు.
తన కెరీర్లో ప్రేక్షకులు ప్రేమగా గుర్తుంచుకున్న ఎన్నో పాటల వెనుక జానకమ్మ మధుర గాత్రం ఉందని చిరంజీవి అన్నారు. ఆ పాటలు వినిపించిన ప్రతిసారీ ఆ రోజులు, ఆ జ్ఞాపకాలు మళ్లీ కళ్లముందు సజీవంగా నిలుస్తాయని భావోద్వేగంగా రాసుకొచ్చారు.
జానకి కేవలం గాయని మాత్రమే కాదని, భావాన్ని స్వరంగా మార్చిన అసాధారణ కళాకారిణి (Extraordinary Artist) అని చిరంజీవి కొనియాడారు. ఆమె పాడిన ప్రతి పాట ఒక జ్ఞాపకం, ఒక అనుభూతి, ఒక జీవితకాలపు అనుబంధమని పేర్కొన్నారు.
సంగీత ప్రపంచం ఈ రోజు ఒక మహోన్నత శిఖరాన్ని కోల్పోయిందని, అయితే జానకి గానం ఎన్నో తరాలకు స్ఫూర్తిగా, మన జీవితాలకు నేపథ్య సంగీతంగా చిరకాలం మార్మోగుతూనే ఉంటుందని చిరంజీవి అన్నారు.
చివరగా ఎస్. జానకి కుటుంబ సభ్యులకు, ఆత్మీయులకు, ఆమెను అభిమానించే కోట్లాది సంగీతాభిమానులకు ప్రగాఢ సానుభూతి తెలియజేస్తూ.. “జానకమ్మ (Janakamma) గారు… మీ స్వరం(Voice) ఎప్పటికీ అమరం” అని పేర్కొన్నారు.
