ఇన్స్టాగ్రామ్, ఫేస్బుక్, యూట్యూబ్… ఏ సోషల్ మీడియా ప్లాట్ఫామ్ ఓపెన్ చేసినా ఒక్కటే హ్యాష్ట్యాగ్ ట్రెండ్ అవుతోంది #SavePunarvika. కేవలం 11 నెలల పసిపాప ప్రాణం కాపాడేందుకు తెలుగు రాష్ట్రాల యువత ఏకమై చేపట్టిన ఈ మహాయజ్ఞం దేశవ్యాప్తంగా చర్చనీయాంశమైంది.
రూ.16 కోట్ల ఇంజెక్షన్ కోసం పోరాటం
పునర్వికశ్రీ అనే చిన్నారి ప్రాణాలు నిలబెట్టాలంటే సుమారు రూ.16 కోట్ల విలువైన ప్రత్యేక ఇంజెక్షన్ అవసరమని ఇటీవల ఒక ఇన్స్టాగ్రామ్ కంటెంట్ క్రియేటర్ వీడియో ద్వారా తెలియజేశాడు. ఆ వీడియో వైరల్ కావడంతో తెలుగు యువత పెద్ద ఎత్తున స్పందించింది. అనేక మంది ప్రముఖ కంటెంట్ క్రియేటర్లు, సోషల్ మీడియా ఇన్ఫ్లూయెన్సర్లు ఫండింగ్ క్యాంపెయిన్లను ప్రారంభించారు.
తాజా సమాచారం ప్రకారం, పునర్విక కోసం రూ.8.53 కోట్లు సేకరించినట్లు ఈ ఉద్యమాన్ని ముందుండి నడిపిస్తున్న యువకుల బృందం ప్రకటించింది. ఎక్కడెక్కడి నుంచి ఎంత మొత్తం వచ్చింది అనే వివరాలను వీడియో ద్వారా వెల్లడించారు. అలాగే, ఫండింగ్ను అధికారికంగా క్లోజ్ చేస్తున్నట్లు ప్రకటించారు. మిగతా అవసరమైన మొత్తాన్ని ఏపీ ప్రభుత్వం సమకూర్చనుందని సమాచారం. ఒక చిన్నారి ప్రాణం కోసం ఇంత భారీ స్థాయిలో స్పందన రావడం తెలుగు సమాజానికి గర్వకారణంగా మారింది.
పునర్విక ఎవరు?
ఆంధ్రప్రదేశ్లోని కర్నూలు జిల్లా వెల్దుర్తికి చెందిన జంపాల మంగలి సురేశ్కుమార్, పుష్పావతి దంపతుల కుమార్తె పునర్వికశ్రీ 2025 మే 12న జన్మించింది. ఆరు నెలల వయసులోనే పునర్విక తన శరీరాన్ని కదిలించలేకపోవడం తల్లిదండ్రులను ఆందోళనకు గురిచేసింది.
ప్రథమంగా కర్నూలులో చికిత్స చేయించినా పరిస్థితి మెరుగుపడకపోవడంతో, వైద్యుల సూచన మేరకు హైదరాబాద్లోని కార్పొరేట్ ఆసుపత్రికి తరలించారు. అక్కడ వైద్యులు పూర్తిస్థాయి పరీక్షలు చేసి, చిన్నారికి అరుదైన జన్యు వ్యాధి అయిన Spinal Muscular Atrophy (SMA) ఉన్నట్లు నిర్ధారించారు.
SMA అంటే ఏమిటి?
SMA అనేది వెన్నెముకలోని మోటార్ న్యూరాన్లను దెబ్బతీసే జన్యుపరమైన వ్యాధి. దీని వల్ల కండరాల బలహీనత, క్షీణత ఏర్పడుతుంది. నడక, శ్వాస, మింగడం వంటి ప్రాథమిక కదలికలు కూడా కష్టమవుతాయి. ఎక్కువగా చిన్నారుల్లో ఈ వ్యాధి కనిపిస్తుంది.
సేవ్ పునర్విక క్యాంపెయిన్ ద్వారా వేలాది మంది చిన్న మొత్తాల విరాళాలు ఇచ్చి, కొందరు పెద్ద మొత్తాలు అందించి, మొత్తం రూ.8.53 కోట్లు సేకరించడం గొప్ప ఉదాహరణగా నిలిచింది. ఒక పసిపాప కోసం తెలుగు యువత ఇలా ఐక్యంగా నిలవడం, సమాజంలో మానవత్వం ఇంకా సజీవంగా ఉందని చాటి చెబుతోంది. ప్రభుత్వం మిగిలిన నిధులు సమకూర్చి పునర్వికకు అవసరమైన చికిత్స అందిస్తే, ఈ ఉద్యమం నిజమైన విజయం సాధించినట్లే అవుతుంది. పునర్విక త్వరగా కోలుకుని ఆరోగ్యంగా పెరగాలని అందరూ కోరుకుంటున్నారు.
