ఈ కాలంలో ఏఐ టెక్నాలజీ అందుబాటులోకి రావడం చాలా మందికి కొత్త అవకాశాలను తెచ్చినప్పటికీ, కొందరికి ఇది సమస్యగా మారింది. ముఖ్యంగా సెలబ్రిటీల ఫోటోలు, వీడియోలు, వాయిస్లను అనుమతి లేకుండా ఉపయోగించి ఆర్థిక లాభాలు పొందడం, దుర్వినియోగం కొనసాగించడం పెద్ద సమస్యగా మారింది. తాజాగా టాలీవుడ్ స్టార్ హీరో పవన్ కళ్యాణ్ (Pawan Kalyan) కుమారుడు అకీరా నందన్ (Akira Nandan) కూడా ఈ అంశంలో ఢిల్లీ హైకోర్టు (Delhi High Court)ను ఆశ్రయించారు. అకీరా ఇప్పటివరకు సినీ పరిశ్రమలో అడుగు పెట్టకపోయినా, సోషల్ మీడియాలో అతనికి మంచి ఫ్యాన్ ఫాలోయింగ్ ఉంది. ఈ నేపథ్యంలో కొంతమంది అతని ఫోటోలు, వీడియోలు, వాయిస్ ఏఐ టెక్నాలజీ (AI Technology) ద్వారా దుర్వినియోగం చేస్తుండటం వల్లే అకీరా కోర్టులో పిటిషన్ దాఖలు చేశారు.
అకీరా తన వ్యక్తిగత హక్కులను కాపాడుకోవడం, తన అనుమతి లేకుండా ఏదైనా అసభ్యకర కంటెంట్ ప్రచురించడం, వ్యాప్తి చెందకుండా తక్షణమే తొలగించడం కోసం కోర్టులో చర్యలు కోరారు. ప్రస్తుతం అకీరా నటనలో శిక్షణ తీసుకుంటున్నట్లు తెలిసింది. అతని అభిమానులు పవన్ కళ్యాణ్ వారసుడిగా సినిమా రంగంలో అడుగు పెడతారని ఆసక్తిగా ఎదురుచూస్తున్నారు. అయితే అకీరాకు నటన కంటే సంగీతం పట్ల ఎక్కువ ఆసక్తి ఉందని తల్లి రేణు దేశాయ్ (Renu Desai) పలు సార్లు వెల్లడించారు. వీరి ఫ్యాన్స్ ఇప్పుడు ఎదురు చూస్తున్నది – వెండి తెరపై హీరోగా దర్శనమిస్తాడా లేదా సంగీత దర్శకుడిగా వెనకిరంగంలో విజయం సాధిస్తాడా అని. అకీరా ప్రస్తుతం విదేశాల్లో శిక్షణ పొందుతున్నట్లు సమాచారం.
