కేబీఆర్ పార్క్ చుట్టూ ట్రాఫిక్ సమస్యను పరిష్కరించేందుకు తెలంగాణ ప్రభుత్వం పెద్ద ఎత్తున రోడ్డు విస్తరణ పనులు ప్రారంభించనుంది. ఈ క్రమంలో పలు ప్రాంతాల్లో ఫ్లై ఓవర్లు, అండర్ పాసుల నిర్మాణం చేపట్టాలని నిర్ణయించింది. ఈ నిర్మాణాల్లో భాగంగా కాంగ్రెస్ నేత, మాజీ మంత్రి జానారెడ్డి, నటుడు-ఎమ్మెల్యే నంద‌మూరి బాలకృష్ణ ఇళ్లకు మార్కింగ్ చేశారు.
జానారెడ్డి, బాలకృష్ణ ఇళ్లను కూల్చేస్తారా?
హైదరాబాద్‌లోని బంజారాహిల్స్ రోడ్ నంబర్ 12లో జానారెడ్డి ఇంటి కాంపౌండ్, జూబ్లీహిల్స్ రోడ్ నంబర్ 45లో బాలకృష్ణ ఇంటికి మార్కింగ్ వేయడం జరిగింది. ఈ మార్కింగ్‌లతో, రోడ్డు విస్తరణ పనుల కోసం కొంతమంది ప్రముఖులను లక్ష్యంగా పెట్టుకున్నట్టు తెలుస్తోంది. అయితే, ఈ మార్పులతో జానారెడ్డి, బాలకృష్ణ అసంతృప్తి వ్యక్తం చేస్తున్నారని ప్రచారం జరుగుతోంది.
ట్రాఫిక్ కోసం కీలక మార్పులు
కేబీఆర్ పార్క్ చుట్టూ రోడ్డు విస్తరణ పనులు ప్రారంభమయ్యాయి. మొత్తం ఆరు జంక్షన్లలో ఆరు అండర్ పాస్‌లు, 8 స్టీల్ బ్రిడ్జిలు నిర్మించనున్నారు. ఈ పనులు 2026 ఫిబ్రవరిలో జీహెచ్ఎంసీ ఎన్నికల ముందు పూర్తి చేయాలని టార్గెట్ పెట్టుకున్నారు. దీంతో, రోడ్డు ట్రాఫిక్‌ను మెరుగుపరచడంలో అర్థ‌వంత‌మైన మార్పులు వస్తాయని అధికారులు అంచనా వేస్తున్నారు.
గ్రీనరీపై ప్రభావం
ఈ నిర్మాణ పనులు కేబీఆర్ పార్క్ గ్రీనరీపై ప్రభావం చూపవచ్చని నేషనల్ గ్రీన్ ట్రిబ్యునల్ (ఎన్జీటీ) ని ఆశ్రయించాల‌ని పలు వర్గాలు నిర్ణ‌యించాయి. అయితే, అధికారులు చెట్లు తొలగించే అవసరం ఉంటే వాటిని ఇతర ప్రాంతాలకు ట్రాన్స్ ప్లాంట్ చేయాలని ఆదేశాలిచ్చారు.
