అమరావతిలో రెండో దశ భూసమీకరణ (Second Phase Land Pooling)పై వైసీపీ అధినేత, మాజీ సీఎం వైఎస్ జగన్మోహన్ రెడ్డి (YS Jagan Mohan Reddy) తీవ్ర అభ్యంతరం వ్యక్తం చేశారు. అమరావతి విస్తరణ పేరుతో మరోసారి భూముల సేకరణపై మాజీ సీఎం తీవ్ర విమర్శలు చేశారు. మొదటి దశలో సేకరించిన భూములకు ఇప్పటివరకు అభివృద్ధి చేయకుండా, మళ్లీ రెండో దశ పేరుతో భూములు ఎందుకు తీసుకుంటున్నారని ఆయన ప్రశ్నించారు. చంద్రబాబు నాయుడు (N. Chandrababu Naidu) చేస్తున్నది పూర్తిగా పిచ్చిపని అంటూ జగన్ మండిపడ్డారు.
జాతీయ మీడియాతో మాట్లాడిన వైఎస్ జగన్, చంద్రబాబు వైఖరిని తీవ్రంగా తప్పుబట్టారు. రాజధాని (Capital) పేరుతో తొలి విడతలోనే సుమారు 50 వేల ఎకరాల భూమిని రైతుల నుంచి తీసుకున్నారని గుర్తు చేశారు. ఆ భూమి అభివృద్ధికే కనీసం రూ.లక్ష కోట్లు అవసరమని అప్పట్లో చంద్రబాబే చెప్పారని గుర్తుచేశారు. అయితే, ఆ నిధులు ఎప్పుడు వస్తాయో, ఎలా సమీకరిస్తారో ఇప్పటికీ స్పష్టత ఇవ్వలేదన్నారు.
ఆ రూ.లక్ష కోట్లు కూడా కేవలం రోడ్లు, విద్యుత్, డ్రైనేజీ, తాగునీరు వంటి మౌళిక సదుపాయాలకే సరిపోతాయని, అయినప్పటికీ, అప్పట్లో భూములు ఇచ్చిన రైతులకు ఇచ్చిన ఒక్క హామీ కూడా ఇప్పటివరకు అమలు కాలేదని విమర్శించారు. చంద్రబాబు చర్యల వల్ల భూములు ఇచ్చిన రైతులు తీవ్రంగా నష్టపోయి బోరుమంటున్నారని, వారికి ఇప్పటివరకు ఎలాంటి న్యాయం జరగలేదన్నారు.
ఇలాంటి పరిస్థితుల్లో రెండో దశ భూసమీకరణ పేరుతో మళ్లీ భూములు ఎందుకు తీసుకుంటున్నారని జగన్ ప్రశ్నించారు. మరో 50 వేల ఎకరాలు తీసుకుని ఏం చేస్తారని నిలదీశారు. మొత్తం లక్ష ఎకరాల భూమికి మౌళిక సదుపాయాలు కల్పించాలంటే కనీసం రూ.2 లక్షల కోట్లు (₹2 Lakh Crore) అవసరమవుతాయని అంచనా వేశారు. ఈ భారీ మొత్తాన్ని ప్రభుత్వం ఎక్కడి నుంచి తెస్తుందో చంద్రబాబు సమాధానం చెప్పాలని డిమాండ్ చేశారు.
చివరగా, రైతుల సంక్షేమం కోసం కాకుండా, తనతో పాటు తన బినామీలు దోచుకోవడానికే చంద్రబాబు భూములు సేకరిస్తున్నారని వైఎస్ జగన్ తీవ్ర ఆరోపణలు చేశారు. రాజధాని పేరుతో జరుగుతున్న ఈ భూసమీకరణ విధానం పూర్తిగా అన్యాయమని, రైతుల జీవితాలతో ఆడుకోవడమేనని జగన్ వ్యాఖ్యానించారు.
