నేటి నుంచి వైఎస్ జగన్ పులివెందుల పర్యటన

ఏపీ (Andhra Pradesh) వైసీపీ (YSRCP) అధినేత, మాజీ ముఖ్యమంత్రి (Former Chief Minister) వైఎస్ జగన్‌మోహన్ రెడ్డి (Y. S. Jagan Mohan Reddy) నేటి నుంచి ఈ నెల 25 వరకు మూడు రోజుల పాటు తన సొంత నియోజకవర్గమైన పులివెందులలో (Pulivendula) పర్యటించనున్నారు. ఈ పర్యటనలో భాగంగా ప్రజలతో నేరుగా మమేకమయ్యే కార్యక్రమాలు, ప్రజాదర్బార్‌లు, క్రిస్మస్ వేడుకల్లో పాల్గొనడం వంటి కీలక కార్యక్రమాలు షెడ్యూల్ చేశారు.

నేటి సాయంత్రం 4 గంటలకు పులివెందుల చేరుకోనున్న జగన్, అక్కడి భాకరాపురం క్యాంప్ ఆఫీసులో ప్రజాదర్బార్ (Public Hearing) నిర్వహించనున్నారు. ఈ కార్యక్రమంలో నియోజకవర్గ ప్రజలు ఎదుర్కొంటున్న సమస్యలను నేరుగా తెలుసుకుని, వారి వినతులు స్వీకరించనున్నారు. ప్రజలతో ప్రత్యక్ష సంభాషణకు ఈ ప్రజాదర్బార్‌ను ఏర్పాటు చేసినట్లు పార్టీ వర్గాలు వెల్లడించాయి.

డిసెంబర్ 24న ఉదయం ఇడుపులపాయకు (Idupulapaya) వెళ్లనున్న జగన్, అక్కడ జరిగే క్రిస్మస్ ప్రత్యేక ప్రార్థనల్లో పాల్గొంటారు. అనంతరం మధ్యాహ్నం 1 గంటలకు తిరిగి పులివెందుల చేరుకొని మరోసారి ప్రజాదర్బార్ నిర్వహించనున్నారు. వరుసగా రెండో రోజు కూడా ప్రజల సమస్యలపై ప్రత్యేకంగా దృష్టి సారించనున్నారు.

డిసెంబర్ 25న ఉదయం 8.30 గంటలకు పులివెందులలోని CSI చర్చిలో జరిగే క్రిస్మస్ వేడుకల్లో (Christmas Celebrations) జగన్ పాల్గొననున్నారు. అనంతరం ఉదయం 10.30 గంటలకు పులివెందుల నుంచి తిరుగు ప్రయాణం కానున్నారు. వైఎస్ జగన్ పర్యటన నేపథ్యంలో స్థానిక వైసీపీ నేతలు, కార్యకర్తలు విస్తృత ఏర్పాట్లు చేస్తున్నారు.