వింబుల్డన్ ఆరంభం: సంచలనాలు.. అల్‌కరాజ్‌కు కఠిన పరీక్ష

‘హ్యాట్రిక్’ (‘Hat-Trick’) టైటిల్ లక్ష్యంగా వింబుల్డన్ (Wimbledon) గ్రాండ్‌స్లామ్ టెన్నిస్ టోర్నీ (Tennis Tournament)లో బరిలోకి దిగిన స్పెయిన్ స్టార్ కార్లోస్ అల్‌కరాజ్‌కు ఊహించని ప్రతిఘటన ఎదురైంది. తొలి రౌండ్ అడ్డంకిని అలవోకగా అధిగమిస్తాడని భావించినా… ఇటలీ సీనియర్ ప్లేయర్ ఫాబియో ఫాగ్‌నిని పోరాటపటిమ కారణంగా ఏకంగా 4 గంటల 37 నిమిషాలు చెమటోడ్చి, ఐదు సెట్‌ల పోరులో అల్‌కరాజ్ విజయం సాధించాడు.

టెన్నిస్ సీజన్ మూడో గ్రాండ్‌స్లామ్ టోర్నమెంట్ వింబుల్డన్‌లో తొలి రోజు సంచలన ఫలితాలు నమోదయ్యాయి. పురుషుల సింగిల్స్ విభాగంలో రష్యా స్టార్, తొమ్మిదో సీడ్ డానిల్ మెద్వెదెవ్, ఎనిమిదో సీడ్ హోల్గర్ రూనె (డెన్మార్క్) తొలి రౌండ్‌లోనే ఇంటిదారి పట్టారు. మరోవైపు, డిఫెండింగ్ ఛాంపియన్, రెండో సీడ్ కార్లోస్ అల్‌కరాజ్ (Carlos Alcaraz) (స్పెయిన్) తొలి రౌండ్‌ను దాటేందుకు తీవ్రంగా శ్రమించాడు. ప్రపంచ 138వ ర్యాంకర్ ఫాబియో ఫాగ్‌నిని (ఇటలీ)తో జరిగిన తొలి రౌండ్ మ్యాచ్‌లో ప్రపంచ రెండో ర్యాంకర్ అల్‌కరాజ్ 7–5, 6–7 (5/7), 7–5, 2–6, 6–1 తేడాతో గెలుపొంది రెండో రౌండ్‌కు చేరుకున్నాడు.

4 గంటల 37 నిమిషాలపాటు జరిగిన ఈ మ్యాచ్‌లో అల్‌కరాజ్ 14 ఏస్‌లు సంధించి, 9 డబుల్ ఫాల్ట్‌లు చేశాడు. 62 అనవసర తప్పిదాలు చేసి, 52 విన్నర్స్ కొట్టాడు. తన సర్వీస్‌ను ఐదుసార్లు కోల్పోయిన అల్‌కరాజ్… ప్రత్యర్థి సర్వీస్‌ను ఏడుసార్లు బ్రేక్ చేశాడు.

ఇతర ముఖ్య ఫలితాలు
బెంజిమిన్ బోంజి (ఫ్రాన్స్) 3 గంటల 7 నిమిషాల్లో 7–6 (7/2), 3–6, 7–6 (7/3), 6–2తో మెద్వెదెవ్‌పై గెలిచాడు.

నికోలస్ జారీ (చెక్ రిపబ్లిక్) 3 గంటల 34 నిమిషాల్లో 4–6, 4–6, 7–5, 6–3, 6–4తో హోల్గర్ రూనెపై గెలిచి రెండో రౌండ్‌లోకి ప్రవేశించారు.

వాలెంటిన్ రాయర్ (ఫ్రాన్స్)తో జరిగిన మ్యాచ్‌లో 24వ సీడ్ సిట్సిపాస్ (గ్రీస్) తొలి రెండు సెట్‌లను 3–6, 2–6తో కోల్పోయాక వెన్నునొప్పితో ఆటను కొనసాగించలేక వైదొలిగాడు.

నిశేష్‌ బసవరెడ్డికి నిరాశ
కెరీర్‌లో తొలిసారి వింబుల్డన్ టోర్నీలో ఆడుతున్న తెలుగు సంతతికి చెందిన అమెరికా ప్లేయర్ నిశేష్ బసవరెడ్డికి నిరాశ ఎదురైంది. తొలి రౌండ్‌లో 20 ఏళ్ల నిశేష్ 6–7 (5/7), 3–6, 2–6 తేడాతో అమెరికాకే చెందిన లెర్నర్ టియెన్ చేతిలో ఓడిపోయాడు. నిశేష్‌కు 66,000 పౌండ్లు (సుమారు రూ. 77 లక్షల 56 వేలు) ప్రైజ్‌మనీగా లభించాయి.

మహిళల సింగిల్స్: కష్టపడ్డ కీస్
మహిళల సింగిల్స్‌లో ప్రపంచ నంబర్‌వన్, టాప్ సీడ్ సబలెంకా (బెలారస్) శుభారంభం చేసింది. తొలి రౌండ్‌లో సబలెంకా 6–1, 7–5తో కార్సన్ బ్రాన్‌స్టిన్ (కెనడా)పై గెలిచింది. ఈ ఏడాది ఆస్ట్రేలియన్ ఓపెన్ ఛాంపియన్, ఆరో సీడ్ మాడిసన్ కీస్ (అమెరికా) గెలిచేందుకు కష్టపడింది. 2 గంటల 41 నిమిషాల పోరులో కీస్ 6–7 (4/7), 7–5, 7–5 తేడాతో ఎలీనా రూసె (రొమేనియా)పై నెగ్గింది. 20వ సీడ్, 2017 ఫ్రెంచ్ ఓపెన్ ఛాంపియన్ ఒస్టాపెంకో (లాత్వియా) మరియు 2022, 2023 రన్నరప్ ఆన్స్ జబూర్ (ట్యునీషియా) తొలి రౌండ్‌లోనే నిష్క్రమించారు.

తొమోవా (బల్గేరియా)తో జరిగిన మ్యాచ్‌లో జబూర్ తొలి సెట్‌ను 6–7 (5/7)తో కోల్పోయి, రెండో సెట్‌లో 0–2తో వెనుకబడిన దశలో గాయంతో వైదొలిగింది. బ్రిటన్ ప్లేయర్ సోనె కార్టల్ 7–5, 2–6, 6–2తో ఒస్టాపెంకోను ఓడించి రెండో రౌండ్‌కు చేరింది.

వింబుల్డన్‌పై అధిక ఉష్ణోగ్రతల ప్రభావం
టోర్నీ మొదటిరోజు రికార్డు స్థాయిలో 33 డిగ్రీల ఉష్ణోగ్రత నమోదైంది. దాంతో ఆటగాళ్లకు పట్టపగలే చుక్కలు కనబడ్డాయి. చాలా మంది ప్లేయర్లు మ్యాచ్ మధ్యలో బ్రేక్‌లు తీసుకుంటూ… ఐస్ ప్యాక్‌లతో శరీరాన్ని చల్లబర్చుకుంటూ… ఆటను కొనసాగించారు.