హృతిక్‌ రోషన్‌ హీరోగా నటించిన ‘వార్ 2’ సినిమాతో జూనియర్‌ ఎన్టీఆర్‌ బాలీవుడ్‌కు పరిచయమవుతున్న సంగతి తెలిసిందే. అయాన్‌ ముఖర్జీ దర్శకత్వం వహించిన ఈ చిత్రం ఆగస్టు 14న తెలుగు, హిందీ, తమిళ భాషల్లో విడుదల కానుంది. ఇప్పటికే రిలీజైన ట్రైలర్‌కు మంచి స్పందన లభించగా, ఇప్పుడు సినిమా ప్రమోషన్స్‌ ఊపందుకున్నాయి.
సోషల్ మీడియాలో సరదా యుద్ధం
‘వార్ 2’ బృందం ఇంటర్వ్యూలు, ప్రెస్‌మీట్‌ల బదులు సోషల్ మీడియా ప్రమోషన్స్‌పై దృష్టి పెట్టింది. ఇందులో భాగంగా, జూనియర్‌ ఎన్టీఆర్‌ తన పోస్టర్‌ ఉన్న బిల్‌బోర్డ్‌ను హృతిక్‌ ఇంటికి పంపించి, “ఈ యుద్ధాన్ని మాతో గెలవలేరు” అని సవాల్‌ విసిరారు. దీనికి బదులుగా హృతిక్‌, “మీరు నాటు నాటు డ్యాన్స్‌ ఎంత చేసినా, ఈ యుద్ధంలో గెలిచేది మాత్రం నేనే” అంటూ తన పోస్టర్‌ను తారక్‌ ఇంటికి పంపారు. ఈ విధంగా వీరిద్దరి మధ్య సోషల్ మీడియాలో ఒక సరదా యుద్ధం నడుస్తోంది.
జనాబే ఆలి పాటకు డ్యాన్స్‌
తాజాగా, ఈ స్నేహపూర్వక యుద్ధాన్ని పక్కనపెట్టి, హృతిక్‌, తారక్‌లు ఇద్దరూ కలిసి డ్యాన్స్‌ చేశారు. ‘జనాబే ఆలి’ (తెలుగులో ‘సలాం అనాలి’) అనే పాటకు స్టైలిష్‌ స్టెప్పులు వేస్తూ అదరగొట్టారు. దీనికి సంబంధించిన ఒక ప్రోమో వీడియోను చిత్ర బృందం విడుదల చేసింది. పూర్తి పాటను చూడాలంటే ఆగస్టు 14న థియేటర్‌కు రావాల్సిందేనని, యూట్యూబ్‌లో విడుదల చేయమని టీం తెలిపింది. ఈ సాంగ్‌ ప్రోమో అభిమానులను బాగా ఆకట్టుకుంటోంది.
