హృతిక్ రోషన్ (Hrithik Roshan)- జూనియర్ ఎన్టీఆర్ (Junior NTR) హీరోలుగా నటిస్తున్న భారీ బడ్జెట్ యాక్షన్ ఎంటర్‌టైనర్ ‘వార్ 2’ (War 2) సినీ అభిమానుల్లో ఇప్పటికే భారీ అంచనాలను రేకెత్తిస్తోంది. యష్ రాజ్ ఫిల్మ్స్ స్పై యూనివర్స్‌లో భాగంగా రూపొందుతున్న ఈ చిత్రం, భారతీయ సినిమా స్థాయిని మరోసారి ప్రపంచవ్యాప్తంగా చాటనుంది. తాజా సమాచారం ప్రకారం, ఈ చిత్రం టీజర్ (Teaser)ను జూ.ఎన్టీఆర్ పుట్టిన రోజు సందర్భంగా ఈనెల 20న విడుదల చేయనున్నారని ఫిల్మ్ నగర్‌లో వార్త వైరల్ అవుతోంది.
ఈ ప్రతిష్టాత్మక ప్రాజెక్ట్‌కు అయాన్ ముఖర్జీ (Ayan Mukerji) దర్శకత్వం వ‌హిస్తున్నారు. ‘బ్రహ్మాస్త్ర’ వంటి భారీ చిత్రాలతో తన సత్తా చాటిన డైరెక్ట‌ర్‌. యష్ రాజ్ ఫిల్మ్స్ అధినేత ఆదిత్య చోప్రా ఈ చిత్రాన్ని నిర్మిస్తున్నారు. ‘వార్’ (2019) లాంటి బ్లాక్‌బస్టర్ తర్వాత, ‘వార్ 2’ ఈ యూనివర్స్‌ను మరింత విస్తరించనుంది. హృతిక్ రోషన్ తన ఐకానిక్ పాత్ర కబీర్ ధలివాల్‌గా తిరిగి వస్తున్నాడు.
జూ.ఎన్టీఆర్ బాలీవుడ్ డెబ్యూ
‘వార్ 2’ జూనియర్ ఎన్టీఆర్‌కు బాలీవుడ్‌లో తొలి ప్రాజెక్ట్ కావడం విశేషం. RRR సినిమాతో ప్రపంచవ్యాప్తంగా గుర్తింపు పొందిన తారక్, ఈ చిత్రంలో సరికొత్త షేడ్స్‌తో కనిపించనున్నారు. ఇండస్ట్రీ టాక్ ప్రకారం, ఎన్టీఆర్ పాత్ర ఒక శక్తివంతమైన విలన్‌గా ఉండవచ్చని తెలుస్తోంది. హృతిక్-ఎన్టీఆర్ కాంబినేషన్‌లోని సీన్స్ అభిమానులకు కనువిందు చేయనున్నాయని అంచనా. హృతిక్ రోషన్ ఇటీవల జూ.ఎన్టీఆర్ అభిమానుల కోసం మే 20, 2025న ఒక భారీ సర్‌ప్రైజ్ ఉంటుందని హింట్ ఇచ్చారు, ఇది ‘వార్ 2’ టీజర్ విడుదలకు సంబంధించినదని ఫ్యాన్స్ భావిస్తున్నారు.
