విశాఖపట్నం (Visakhapatnam)లో 25 గ్రాముల కొకైన్ (Cocaine) డ్రగ్స్ (Drugs) కేసు రాష్ట్ర రాజకీయాల్లో సంచలనం సృష్టిస్తోంది. ఈ కేసులో కూటమి నాయకులకు సంబంధించిన ఆరోపణలు ఒక్కొక్క‌టిగా వెలుగులోకి వస్తున్నాయి. త్రీ టౌన్ పోలీసులు ఈ కేసులోని రిమాండ్ రిపోర్ట్‌ (Remand Report)లో విశాఖలోని ఓ పబ్‌ (Pub)లో డ్రగ్స్ వాడకం, దానికి సంబంధించిన చర్చలు జరిగినట్లు పేర్కొన్నారు. కూటమి నాయకులకు (Alliance Leaders) చెందిన ఈ పబ్‌లో డ్రగ్స్ వినియోగం జరిగినట్లు పోలీసులు గుర్తించిన‌ట్లుగా స‌మాచారం. ఈ కేసులో నిందితుడు చెకురి అక్షయ్ (Chekuri Akshay) (34), ఢిల్లీ (Delhi) నుంచి ఒక గ్రాము కొకైన్‌ను 10 వేల రూపాయలకు కొనుగోలు చేసినట్లు పోలీసులు నిర్ధారించారు. అక్షయ్‌తో పాటు దక్షిణాఫ్రికాకు చెందిన థామస్ డిజిమన్ (30)ను ఈగల్ టీమ్, త్రీ టౌన్ పోలీసులు సంయుక్తంగా జూలై 5న అరెస్టు చేశారు.
ఎమ్మెల్యే, ఎంపీకి కేసులో లింకులు?
ఈ కేసు విచారణలో కూటమి నాయకులు, వారి కుమారుల ప్రమేయం ఉన్నట్లు ఆరోపణలు వెలుగులోకి వస్తున్నాయి. కూటమి నాయకుల కుమారులను తప్పించేందుకు పోలీసులపై ఒత్తిడి జరిగినట్లు స్థానికంగా చర్చ జరుగుతోంది. జూలై 5న ఓ కూటమి ఎమ్మెల్యే నేరుగా విశాఖ పోలీసు ఉన్నతాధికారిని కలిసి, ఈ కేసులో ముగ్గురు నిందితులను విడుదల చేయించినట్లు గుసగుసలు వినిపిస్తున్నాయి. వైసీపీ నాయకుడు, మాజీ మంత్రి గుడివాడ అమర్‌నాథ్, కూటమి నాయకులైన విశాఖ ఎంపీ ఎం. శ్రీభరత్, తూర్పు ఎమ్మెల్యే వెలగపూడి రామకృష్ణ, ఎమ్మెల్యే బండారు సత్యనారాయణ మూర్తి, ఆయన కుమారుడు ఈ కేసులో ప్రమేయం ఉన్నట్లు ఆరోపించారు. ఈ ఆరోపణలు పోలీసు విచారణను పక్కదారి పట్టించాయని, సీసీటీవీ ఫుటేజ్, కాల్ డేటా రికార్డులను విడుదల చేయాలని ఆయన డిమాండ్ చేశారు.
విశాఖను డ్రగ్స్ క్యాపిటల్గా మార్చారా..?
ఈ కేసులో పోలీసులు ఢిల్లీకి ఒక ప్రత్యేక బృందాన్ని పంపి, డ్రగ్స్ సరఫరా గొలుసు లింకులను గుర్తించే పనిలో ఉన్నారు. ఢిల్లీలోని ప్రిన్స్ అలియాస్ ఒమెనెఫె, బుచ్చి అనే వ్యక్తులు ఈ రాకెట్‌లో కీలక వ్యక్తులుగా ఉన్నట్లు పోలీసులు గుర్తించారు. అక్షయ్ ఈ డ్రగ్స్‌ను తన స్నేహితులైన రఘు, కృష్ణ చైతన్య, గౌతమ్‌లతో కలిసి వినియోగించేందుకు కొనుగోలు చేసినట్లు తెలిపాడు. ఈ కేసు రాష్ట్రంలో డ్రగ్ సంస్కృతి విస్తరణను బహిర్గతం చేస్తోంది. విశాఖను డ్రగ్స్ క్యాపిటల్గా మార్చారని, ప్రభుత్వం డ్రగ్స్‌ను పోషిస్తోందని వైసీపీ ఆరోపిస్తోంది. డ్రగ్స్ కేసు రాష్ట్రంలో సంచలనం సృష్టిస్తుండ‌గా, ఈ కేసులో కూటమి నేత‌ల కుమారులు ఉండ‌డంతో విశాఖలోని ఎంపీ, ఎమ్మెల్యే వారిని తప్పించేందుకు తీవ్రంగా ప్ర‌య‌త్నిస్తున్న వార్తలు విశాఖ‌లో హ‌ల్‌చ‌ల్ చేస్తున్నాయి.
