గ్రేటర్ విశాఖపట్నం మున్సిపల్ కార్పొరేషన్ (GVMC) డిప్యూటీ మేయర్ ఎన్నిక ప్రక్రియ రాజకీయ ఉత్కంఠతో, కూటమి పార్టీల మధ్య వివాదంతో సంచలనంగా మారింది. జనసేన పార్టీకి డిప్యూటీ మేయర్ పదవి కేటాయించడంతో టీడీపీలో తీవ్ర అసంతృప్తి నెలకొంది. ఈ నేపథ్యంలో కాపు, యాదవ సామాజిక వర్గాలకు చెందిన కార్పొరేటర్లు సమన్వయ సమావేశం నుంచి అలిగి వెళ్లిపోవడం, ఎన్నికకు హాజరు కాకపోవడంతో సరిపడా సంఖ్యాబలం లేక ఎన్నికను రేప‌టికి వాయిదా వేశారు. సంఖ్యాబలం లేక‌పోయినా వైసీపీ నుంచి లాక్కున్న విశాఖ డిప్యూటీ మేయర్ పదవి కూటమి పార్టీల మధ్య కుంప‌టి రాజేసింద‌ని స్థానికులు ఎద్దేవా చేస్తున్నారు.
జనసేనకు డిప్యూటీ మేయర్ పదవి
జనసేన అధిష్ఠానం 64వ వార్డు కార్పొరేటర్ దల్లి గోవింద రెడ్డిని డిప్యూటీ మేయర్ అభ్యర్థిగా ఖరారు చేసింది. ఈ నిర్ణయాన్ని జనసేన అధికారికంగా ప్రకటించింది. సీల్డ్ కవర్‌లో గోవింద రెడ్డి పేరును పంపినట్లు వెల్లడైంది. జనసేన బలం GVMC కౌన్సిల్‌లో 4 నుంచి 17 మందికి (ముగ్గురు ఎక్స్-ఆఫీషియో సభ్యులతో సహా) పెరిగిన నేపథ్యంలో, పార్టీ ఈ పదవిని గట్టిగా డిమాండ్ చేసి సాధించింది.
టీడీపీలో అసంతృప్తి, కార్పొరేటర్ల నిరసన
డిప్యూటీ మేయర్ పదవిని జనసేనకు కేటాయించడంపై టీడీపీ కార్పొరేటర్లలో ఆగ్రహం వ్యక్తమైంది. మేయర్ పదవి ఇప్పటికే టీడీపీకి (పీలా శ్రీనివాస రావు) దక్కిన నేపథ్యంలో, డిప్యూటీ మేయర్ పదవి కూడా తమకే రావాలని టీడీపీ ఆశించింది. అయితే, కూటమి ఒప్పందంలో భాగంగా జనసేనకు పదవి కేటాయించడంతో, కాపు, యాదవ సామాజిక వర్గాలకు చెందిన టీడీపీ కార్పొరేటర్లు తీవ్రంగా నిరసన వ్యక్తం చేశారు. సమన్వయ సమావేశంలో చర్చలు విఫలమవడంతో, కొందరు కార్పొరేటర్లు సమావేశం నుంచి వెళ్లిపోయారు.
కోరం సరిపడక వాయిదా
ఇవాళ జరగాల్సిన డిప్యూటీ మేయర్ ఎన్నికకు కావాల్సిన కోరం (కనీస సంఖ్యాబలం) 56 మంది కార్పొరేటర్లు. అయితే, కాపు, యాదవ సామాజిక వర్గాలకు చెందిన కొందరు టీడీపీ కార్పొరేటర్లు ఎన్నికకు హాజరు కాకపోవడంతో కేవలం 54 మంది మాత్రమే హాజరయ్యారు. దీంతో జిల్లా కలెక్టర్ ఎన్నికను రేప‌టికి వాయిదా వేశారు. ఈ విషయం ఎక్స్ పోస్ట్‌లలో కూడా చర్చనీయాంశమైంది, “కూటమిలో కొత్త వివాదం మొదలైంది” అని కామెంట్లు పెడుతున్నారు.
గతంలో మేయర్ ఎన్నికలో టీడీపీ అభ్యర్థి పీలా శ్రీనివాస రావు ఏకగ్రీవంగా ఎన్నికైనప్పటికీ, డిప్యూటీ మేయర్ ఎన్నికలో 10-12 మంది కార్పొరేటర్లు (టీడీపీ, జనసేన నుంచి) పోటీ పడ్డారు. ఈ పోటీలో కుల సమీకరణలు, స్థానిక నాయకుల ప్రభావం కీలకంగా మారాయి. గాజువాక నుంచి ఒక టీడీపీ కార్పొరేటర్ బలమైన అభ్యర్థిగా ఉన్నప్పటికీ, జనసేన గోవింద రెడ్డిని ఎంచుకోవడం వివాదానికి దారితీసింది. ఈ ఎన్నిక వివాదం సోష‌ల్ మీడియాలో విస్తృతంగా చర్చనీయాంశమైంది. గోవింద రెడ్డి ఎన్నికను జనసేన విజయంగా అభివర్ణించగా, మరికొంద‌రు కూటమిలో వివాదం తలెత్తినట్లు కామెంట్లు పెడుతున్నారు.
