విశాఖపట్నం (Visakhapatnam)లో 25 గ్రాముల కొకైన్ (Cocaine) కేసు రాష్ట్ర రాజకీయాల్లో సంచలనం సృష్టిస్తోంది. వైజాగ్ త్రీ టౌన్ పోలీస్ స్టేషన్ పరిధిలో డ్రగ్స్ రవాణా చేస్తున్న ఐదుగురిని అదుపులోకి తీసుకున్న పోలీసులు, ఈ కేసులో ఇప్పటివరకు ముగ్గురిని అరెస్టు చేశారు. డ్రగ్స్ రవాణా కేసులో కూటమి నేత‌ల (Alliance Leaders) కుమారులు (Sons) ఉన్న‌ట్లుగా తెలుస్తోంది. ఈ ఘటనలో దక్షిణాఫ్రికాకు చెందిన థామస్ డ్జిమోన్ (Thomas Dzimon), విశాఖకు చెందిన అక్షయ్ కుమార్ (Akshay Kumar) అలియాస్ మున్నా, డాక్టర్ శ్రీ కృష్ణ చైతన్య వర్మ (Sri Krishna Chaitanya Varma) అరెస్టయ్యారు.
ఈ కేసులో డాక్టర్ కృష్ణ చైతన్య వర్మ రూ. 65 వేలతో కొకైన్ కొనుగోలు చేయడానికి ప్రయత్నించినట్లు పోలీసులు గుర్తించారు. ఈ ఘటన రాష్ట్రంలో డ్రగ్స్ మాఫియా లింకులను బయటపెట్టడంతో పాటు, కూటమి నాయకుల కుమారుల ప్రమేయం, పోలీసు చర్యల్లో జోక్యం ఆరోపణలతో తీవ్ర చర్చనీయాంశంగా మారింది. శనివారం అదుపులోకి తీసుకున్న ఐదుగురిలో ఇద్దరిని అరెస్టు చేసినట్లు పోలీసులు ప్రకటించారు, మిగిలిన ముగ్గురిని అనుమానితులుగా పేర్కొన్నారు. ఆదివారం డాక్టర్ శ్రీ కృష్ణ చైతన్య వర్మను అరెస్టు చేసినట్లు తెలిపారు. ఈ కేసులో ఢిల్లీ నుంచి విశాఖపట్నంకు డ్రగ్స్ రవాణా చేసిన‌ట్లుగా తెలుస్తోంది.
అయితే, ఈ ఘటనలో కూటమి నాయకుల కుమారుల ప్రమేయం ఉన్నట్లు ఆరోపణలు వెల్లువెత్తాయి. 25 గ్రాముల కోకైన్ కేసులో ఉన్న కూటమి నేత‌ల కుమారులను తప్పించే ప్రయత్నం జరుగుతోంది అని స్థానికంగా ఓ వాద‌న క‌ల‌క‌లం సృష్టిస్తోంది. ఈ సీన్‌లోకి డైరెక్ట్‌గా కూటమి ఎమ్మెల్యేలు, ఓ ఎంపీ ఎంట్రీ ఇచ్చార‌ని, కూటమి ఎమ్మెల్యే ఫోన్ కాల్ ద్వారా ముగ్గురు అనుమానితులను పోలీసు కస్టడీ నుంచి తప్పించినట్లు స్థానికులు చ‌ర్చించుకుంటున్నారు. ఈ ఆరోపణలు కూటమి ప్రభుత్వంపై తీవ్ర విమర్శలకు దారితీశాయి. చంద్రబాబు నాయుడు పాలనలో విశాఖ డ్రగ్స్‌కు అడ్డాగా మారిందని వైసీపీ ఆరోపిస్తోంది.
ఈ కేసు రాష్ట్రంలో డ్రగ్స్ మాఫియాపై పోలీసులు తీసుకుంటున్న చర్యలు, రాజకీయ జోక్యం ఆరోపణలపై తీవ్ర చర్చను రేకెత్తించింది. కూటమి ప్రభుత్వం డ్రగ్స్ సమస్యను నియంత్రించడంలో విఫలమైందని మండిప‌డుతోంది. రాజకీయ ప్రముఖుల కుమారులను కాపాడేందుకు పోలీసు వ్యవస్థను దుర్వినియోగం చేస్తోందని ఆరోపిస్తున్నారు. ఈ ఘటనపై పూర్తి విచారణ జరిపి, దోషులను కఠినంగా శిక్షించాలని, డ్రగ్స్ రవాణాను అరికట్టడానికి కఠిన చర్యలు తీసుకోవాలని ప్రజలు డిమాండ్ చేస్తున్నారు. రాష్ట్ర ప్రభుత్వం, పోలీసు యంత్రాంగం ఈ ఆరోపణలపై ఎలాంటి స్పందన, చర్యలు తీసుకుంటాయనేది రాజకీయ వర్గాల్లో ఆసక్తికరంగా మారింది.
