భారతీయ సినిమా (Indian Cinema) పరిశ్రమలో లెజెండరీ (Legendary) నటి (Actress)గా గుర్తింపు పొందిన బి. సరోజా దేవి (B. Saroja Devi) (87) సోమవారం ఉదయం బెంగళూరు (Bengaluru)లోని తన నివాసంలో తుదిశ్వాస (Last Breath) విడిచారు. వయోసహజ అనారోగ్యంతో బాధపడుతున్న ఆమె, ఆసుపత్రిలో చికిత్స పొందుతూ కన్నుమూశారని కుటుంబ సభ్యులు తెలిపారు. ఈ వార్త సినీ పరిశ్రమలో విషాద ఛాయలను అలుముకుంది. ఎన్టీఆర్, ఏఎన్ఆర్, ఎంజీఆర్, శివాజీ గణేశన్ లాంటి దిగ్గజ నటులతో నటించిన సరోజా దేవి, తన అభినయంతో ప్రేక్షకుల హృదయాలను గెలుచుకున్నారు.
1955లో కన్నడ చిత్రం మహాకవి కాళిదాసతో తెరంగేట్రం చేసిన సరోజా దేవి, ఆ చిత్రంతోనే జాతీయ అవార్డును అందుకున్నారు. తెలుగులో పాండురంగ మహత్యం (1957)తో అడుగుపెట్టి, ఇంటికి దీపం ఇల్లాలే, మంచి చెడు, దాగుడు మూతలు, పండంటి కాపురం, దాన వీర శూర కర్ణ, అల్లుడు దిద్దిన కాపురం వంటి చిత్రాలల్లో న‌టించి తన న‌ట‌న‌తో ప్రేక్షకులను కట్టిపడేశారు.
తమిళంలో నడోడి మన్నన్ (1958) ఆమెను అగ్ర నటిగా నిలబెట్టగా, ఎంజీఆర్, శివాజీ గణేశన్‌లతో నటించిన 26 చిత్రాలు బాక్సాఫీస్ విజయాలుగా నిలిచాయి. హిందీలో పైగామ్ (1959), ససురాల్ (1961), ప్యార్ కియా తో డర్నా క్యా (1963) వంటి చిత్రాలతో బాలీవుడ్‌లోనూ సత్తా చాటారు. కన్నడలో కిత్తూరు రాణి చెన్నమ్మ (1961)లో యాంటీ-బ్రిటిష్ రాణిగా ఆమె నటన విమర్శకుల ప్రశంసలు అందుకుంది. 1955 నుంచి 1984 వరకు 161 చిత్రాల్లో హీరోయిన్‌గా నటించిన ఆమె, కన్నడలో ‘అభినయ సరస్వతి’, తమిళంలో ‘కన్నడత్తు పైంగిలి’గా పేరుగాంచారు.
సరోజా దేవి 1969లో పద్మశ్రీ, 1992లో పద్మభూషణ్ అవార్డులను అందుకున్నారు. బెంగళూరు విశ్వవిద్యాలయం నుంచి గౌరవ డాక్టరేట్, తమిళనాడు ప్రభుత్వం నుంచి కలైమామణి అవార్డు, 2008లో భారత ప్రభుత్వం నుంచి లైఫ్‌టైమ్ అచీవ్‌మెంట్ అవార్డు పొందారు. 1967లో శ్రీ హర్ష అనే ఇంజనీర్‌ను వివాహం చేసుకున్న ఆమె, 1986లో ఆయన మరణంతో సినిమాల నుంచి తాత్కాలిక విరామం తీసుకున్నారు. సరోజా దేవి మరణంతో దక్షిణ భారత సినిమా ఒక గొప్ప నటిని కోల్పోయిందని, ఆమె నటన శైలి, ఫ్యాషన్ స్టైల్ ఎప్పటికీ గుర్తుండిపోతాయని సినీ ప్రముఖులు సంతాపం వ్యక్తం చేశారు.
