బాలీవుడ్ (Bollywood) నటి తనుశ్రీ దత్తా (Tanushree Dutta) మరోసారి తన భావోద్వేగ వీడియోతో సోష‌ల్ మీడియాలో సంచలనం సృష్టించారు. మంగ‌ళ‌వారం ఇన్‌స్టాగ్రామ్‌ (Instagram)లో పోస్ట్ చేసిన వీడియోలో ఆమె కన్నీరుమున్నీరుగా విలపిస్తూ, తన సొంత ఇంట్లో 2018 నుంచి వేధింపులకు గురవుతున్నానని ఆరోపించారు. “నన్ను నా ఇంట్లోనే వేధిస్తున్నారు. గత 4-5 సంవత్సరాలుగా ఈ వేధింపుల (Harassments) వల్ల నా ఆరోగ్యం దెబ్బతిని, పని చేయలేని స్థితిలో ఉన్నాను” అని ఆమె ఆవేదన వ్యక్తం చేశారు.
తన ఇంటి వద్ద అర్ధరాత్రి వింత శబ్దాలు, దొంగలు, గుమ్మం బాదడం వంటి ఘటనలు జరుగుతున్నాయని, ఇంట్లో పనిమనిషిని కూడా నియమించుకోలేని పరిస్థితి ఏర్పడిందని తెలిపారు. ఈ పరిస్థితితో విసిగిపోయిన తనుశ్రీ ముంబై (Mumbai)లోని ఓషివారా (Oshiwara) పోలీస్ స్టేషన్‌ (Police Station)ను సంప్రదించి, త్వరలో ఎఫ్‌ఐఆర్ దాఖలు చేయనున్నట్లు చెప్పారు. 2018లో నానా పటేకర్‌ (Nana Patekar)పై లైంగిక వేధింపుల ఆరోపణలతో భారతదేశంలో #MeToo ఉద్యమాన్ని ప్రారంభించిన తనుశ్రీ, ఈ వీడియోతో మరోసారి తన ధైర్యం, ఆవేదనను ప్రపంచానికి చాటారు.
వీడియోలో తనుశ్రీ తీవ్ర ఒత్తిడి, ఆందోళన కారణంగా క్రానిక్ ఫెటీగ్ సిండ్రోమ్‌తో బాధపడుతున్నట్లు వెల్లడించారు. “2020 నుంచి రాత్రివేళల్లో ఇంటి పైకప్పుపై, గుమ్మం వద్ద బిగ్గరగా శబ్దాలు వస్తున్నాయి. ఫిర్యాదు చేయడం మానేశాను, హిందూ మంత్రాలతో మనస్సును ప్రశాంతంగా ఉంచుకుంటున్నాను” అని ఆమె తెలిపారు. ఈ వీడియో సామాజిక మాధ్యమాల్లో వైరల్ కావడంతో, అనేక మంది అభిమానులు, నెటిజన్లు “ధైర్యంగా ఉండు, అంతా సవ్యంగా ఉంటుంది” అంటూ మద్దతు తెలిపారు.
