తమిళనాడు రాష్ట్రాన్ని వరుణదేవుడు భయపెట్టాడు. ఇటీవల ప్రారంభమైన వర్షాల‌తో అక్కడి పలు ప్రాంతాలు తీవ్ర జ‌ల‌మ‌యం అయ్యాయి. ముఖ్యంగా నీలగిరి (Nilgiri) జిల్లా పూర్తిగా దెబ్బతిన్నది. కొండచరియలు విరిగిపడిన ఘటనలతో పాటు భారీ వృక్షాలు నేలకూలాయి. ఈ కారణంగా పలు గ్రామాల మధ్య రవాణా పూర్తిగా నిలిచిపోయింది.
ఇప్పటికే నీలగిరి జిల్లాతో పాటు కోయంబత్తూర్ (Coimbatore) జిల్లాకు రెడ్ అలర్ట్ (Red Alert) ప్రకటించగా, తేని (Theni), తిరునల్వేలి (Tirunelveli)తో పాటు మరో ఆరు జిల్లాలకు ఆరెంజ్ అలర్ట్ (Orange Alert) జారీ చేశారు. సాధారణ ప్రజలు అప్రమత్తంగా ఉండాలంటూ అధికారులు హెచ్చరికలు జారీ చేస్తున్నారు.
ఈ పరిస్థితుల మధ్య పర్యాటక ప్రదేశాల పరిస్థితి మరింత దిగజారింది. వర్షాల ధాటికి పర్యాటక ప్రాంతాలు ప్రమాదకరంగా మారిన నేపథ్యంలో రెండు రోజుల పాటు వీటిని మూసివేస్తున్నట్టు అధికారులు వెల్లడించారు. నీలగిరి, కొడైకెనాల్ (Kodaikanal), ఊటీ (Ooty) వంటి ప్రసిద్ధ పర్యాటక కేంద్రాల్లో సందర్శకులను అనుమతించట్లేదు.
ఇక వర్షాల ప్రభావం వనరులపై కూడా స్పష్టంగా కనిపిస్తోంది. తిరునల్వేలి జిల్లాలోని పాపనాసం (Papanasam) ప్రాజెక్టులో నీటి మట్టం వేగంగా పెరిగింది. ఈ ప్రాజెక్టు పూర్తిస్థాయి నీటినిల్వ సామర్థ్యం 5,500 క్యూసెక్కులు కాగా, ప్రస్తుతం అది 2,900 క్యూసెక్కుల వరకు చేరుకుంది.
వర్షాకాలం ఇప్పుడే మొదలవుతుండగా పరిస్థితులు ఇంత భయానకంగా ఉండటంతో ప్రజలు భయాందోళనకు గురవుతున్నారు. ప్రభుత్వం పర్యవేక్షణలో అధికారులు సమయానుసారంగా చర్యలు తీసుకుంటున్నట్లు అధికార వర్గాలు తెలియజేశాయి. వర్షాల తీవ్రత మరింత పెరిగే అవకాశాలుండటంతో అన్ని జిల్లాల్లో అధిక అప్రమత్తత పాటిస్తున్నారు. ఇలాంటి పరిస్థితుల్లో ప్రజలు అప్రమత్తంగా ఉండాలని, అధికారుల సూచనలు తప్పకుండా పాటించాలని హెచ్చరికలు జారీ అయ్యాయి.
