అల‌హాబాద్ హైకోర్టు తీర్పు త‌ప్పు.. – సుప్రీంకోర్టు స్పష్టత

అత్యాచారం కేసులో అలహాబాద్ హైకోర్టు ఇచ్చిన వివాదాస్పద తీర్పును సుప్రీంకోర్టు తీవ్రంగా తప్పుబట్టింది. “పైజామా దారం విప్పడం, ప్రైవేట్ పార్ట్స్ తాక‌డం వంటి చర్యలు అత్యాచారయత్నం కిందకే వస్తాయి” అని అత్యున్నత న్యాయస్థానం స్పష్టం చేసింది. లైంగిక నేరాల కేసుల్లో చట్టపరమైన అవగాహనతో పాటు సానుభూతి దృక్పథం అవసరమని పేర్కొంది.

హైకోర్టు తీర్పుపై ఘాటు వ్యాఖ్యలు
ప్రధాన న్యాయమూర్తి సూర్యకాంత్, న్యాయమూర్తులు జోయ్‌మల్య బాగ్చీ, ఎన్వీ అంజరియాలతో కూడిన త్రిస‌భ్య‌ ధర్మాసనం ఈ కేసును విచారించింది. “బాలిక ప్రైవేట్ పార్ట్స్ తాక‌డం, ఆమె పైజామా నాడా లాగడం, బలవంతంగా ఒంటరి ప్రదేశానికి తీసుకెళ్లే ప్రయత్నం చేయడం.. ఇవన్నీ స్పష్టంగా అత్యాచారయత్నం పరిధిలోకి వస్తాయి” అని కోర్టు పేర్కొంది. గతంలో హైకోర్టు ఇచ్చిన తీర్పులో ఈ చర్యలు ‘రేప్ కిందకు రావు, రేప్‌కు ముందు దశ మాత్రమే’ అని వ్యాఖ్యానించడం సుప్రీంకోర్టు దృష్టిలో తీవ్ర లోపంగా పరిగణించబడింది.

సుమోటోగా స్వీకరణ
హైకోర్టు తీర్పుపై దేశవ్యాప్తంగా విమర్శలు రావడంతో, సుప్రీంకోర్టు ఫిబ్రవరి 10న సుమోటోగా పిటిషన్ నమోదు చేసి విచారణ చేపట్టింది. హైకోర్టు నిర్ణయాన్ని తప్పుబడుతూ, లైంగిక నేరాల నుండి పిల్లల రక్షణ (Protection of Children from Sexual Offences Act – POCSO) చట్టం కింద ఇద్దరు నిందితులపై అత్యాచారయత్నం అభియోగాలను తిరిగి మోపాలని ఆదేశించింది. “నిందితుల చర్యలు స్పష్టంగా అత్యాచారం చేయాలనే ఉద్దేశంతోనే జరిగినవి” అని సుప్రీంకోర్టు వ్యాఖ్యానించింది.

కేసు నేపథ్యం
2021 నవంబర్ 10న ఒక మహిళ తన 14 ఏళ్ల కుమార్తెతో కలిసి ఇంటికి వెళ్తుండగా, పక్క గ్రామానికి చెందిన ముగ్గురు యువకులు బైక్‌పై వచ్చి లిఫ్ట్ ఇస్తామని ఆపారు. బాలికను బలవంతంగా కాలువ కిందకు తీసుకెళ్లేందుకు ప్రయత్నించారు. ఈ సమయంలో ఆమె పైజామా నాడా లాగడం, వక్షస్థలం పట్టుకోవడం వంటి చర్యలకు పాల్పడ్డారు.

బాలిక కేకలు వేయడంతో సమీపంలో ఉన్న వ్యక్తులు అక్కడికి చేరుకున్నారు. దీంతో నిందితులు అక్కడి నుంచి పరారయ్యారు. ఈ కేసులో 2025 మార్చి 17న అలహాబాద్ హైకోర్టు ఇచ్చిన తీర్పులో, పై చర్యలు అత్యాచారం కాదని పేర్కొనడం వివాదాస్పదమైంది.

లైంగిక నేరాలపై సున్నిత దృక్పథం అవసరం
సుప్రీంకోర్టు తన వ్యాఖ్యల్లో, లైంగిక నేరాల కేసుల్లో కోర్టులు సాంకేతిక పరిమితుల్లో కాకుండా బాధితుల పరిరక్షణను దృష్టిలో ఉంచుకుని నిర్ణయాలు తీసుకోవాలని స్పష్టం చేసింది. ముఖ్యంగా మైనర్లకు సంబంధించిన కేసుల్లో చట్టాల ఉద్దేశాన్ని గౌరవించాలని సూచించింది. ఈ తాజా తీర్పుతో, లైంగిక దాడి మరియు అత్యాచారయత్నం మధ్య గీత ఎక్కడ వేయాలనే అంశంపై స్పష్టత వచ్చినట్లు న్యాయవర్గాలు అభిప్రాయపడుతున్నాయి.