తొమ్మిది నెలలుగా అంతరిక్షంలో ఉండిపోయిన ఇద్దరు వ్యోమ‌గామీలు భూమి మీద‌కు వ‌చ్చే స‌మ‌యం ఎట్ట‌కేల‌కు ఆసన్న‌మైంది. భారత సంతతికి చెందిన ప్రముఖ నాసా వ్యోమగామి సునీతా విలియమ్స్ 2024 జూన్ 5న బోయింగ్ స్టార్‌లైనర్ వ్యోమనౌక ద్వారా అంతర్జాతీయ అంతరిక్ష కేంద్రం (ISS)కి వెళ్లారు. ఆమెతో పాటు బుచ్ విల్మోర్ కూడా ఈ మిషన్‌లో పాల్గొన్నారు. తొలుత జూన్ 13న భూమికి తిరిగి రావాల్సిన ఈ ఇద్దరు వ్యోమగాములు, స్టార్‌లైనర్ థ్రస్టర్ సమస్యల కారణంగా ఇప్పటివరకు అక్కడే ఉండిపోయారు.
సురక్షిత రాకకు ప్రణాళికలు
ఇద్దరు వ్యోమ‌గామీల‌ను భూమికి తీసుకురావడానికి నాసా మరియు స్పేస్‌ఎక్స్ సంస్థలు కలిసి ప్రణాళికలు సిద్ధం చేశాయి. స్పేస్‌ఎక్స్ క్రూ-10 మిషన్ ద్వారా మార్చి 16న వీరిని రప్పించేందుకు ఏర్పాట్లు చేయగా, తాజా నాసా ప్రకటన ప్రకారం సునీతా విలియమ్స్ మరియు బుచ్ విల్మోర్ మార్చి 19న భూమికి చేరుకునే అవకాశం ఉంది.
ప్రస్తుతం సునీతా విలియమ్స్ మొత్తం 9 నెలలుగా అంతరిక్షంలో ఉన్నారు. ఈ సుదీర్ఘ ప్రయాణం విజయవంతంగా ముగియాలని ప్రపంచవ్యాప్తంగా ఉన్న అభిమానులు ఆసక్తిగా ఎదురుచూస్తున్నారు.
