సృష్టి టెస్ట్ ట్యూబ్ బేబీ సెంటర్ (Srushti Test Tube Baby Center’s)కు సంబంధించిన అక్రమాలు తెలుగు రాష్ట్రాల్లో తీవ్ర కలకలం రేపుతున్నాయి. సికింద్రాబాద్ (Secunderabad)లోని ఈ సెంటర్లో జరిగిన మోసం తర్వాత, విశాఖపట్నం (Visakhapatnam)లోని బ్రాంచ్లో కూడా ఇలాంటి దందాలు నడిపినట్లుగా పోలీసుల దర్యాప్తులో వెలుగు చూసింది. ఢిల్లీ (Delhi)కి చెందిన ఒక గర్భిణిని (Pregnant Woman) విమానం (Flight)లో విశాఖపట్నంలోని సృష్టి సెంటర్కు తీసుకొచ్చి, ఆమె బిడ్డను సరోగసీ (Surrogacy) ద్వారా పుట్టినట్లు నమ్మించి, ఆ బిడ్డను ఇతర దంపతులకు అప్పగించిన ఘటన బయటపడింది. ఈ కేసులో ప్రధాన నిందితురాలు డాక్టర్ నమ్రత (Dr.Namrata)ను పోలీసులు అదుపులోకి తీసుకున్నారు, ఆమెపై గతంలోనూ ఇలాంటి అక్రమాలకు సంబంధించి ఆరోపణలు ఉన్నాయని తెలిసింది.
డాక్టర్ నమ్రత నడిపిస్తున్న సృష్టి టెస్ట్ ట్యూబ్ బేబీ సెంటర్ హైదరాబాద్, విజయవాడ, విశాఖపట్నం, బెంగళూరు, భువనేశ్వర్, కోల్కతా వంటి నగరాల్లో శాఖలను నిర్వహిస్తూ, సరోగసీ, పసికందుల అక్రమ విక్రయాల దందాను నడిపిస్తోందని పోలీసులు గుర్తించారు. గతంలో, 2010లో విశాఖపట్నంలో ఈ సెంటర్ ఏర్పాటై, ఆ తర్వాత కోట్ల రూపాయల విలువైన అక్రమ కార్యకలాపాలు నిర్వహించినట్లు వెల్లడైంది. ముఖ్యంగా, గతంలో కోల్కతా (Kolkata) లో ఒక దంపతులకు 30 లక్షల రూపాయలకు ఒక బిడ్డను అమ్మకానికి పెట్టిన ఆరోపణలు నమ్రతపై ఉన్నాయి. తాజాగా సృష్టి టెస్ట్ ట్యూబ్ బేబీ సెంటర్లో తనిఖీలు చేపట్టారు, ఈ సందర్భంగా కీలక పత్రాలు, వీర్యం శాంపిల్స్ను స్వాధీనం చేసుకున్నారు.
నమ్రత గతంలో 2018, 2019, 2020లలో కూడా ఇలాంటి కేసుల్లో అరెస్టై, తెలంగాణ మెడికల్ కౌన్సిల్ ఆమె లైసెన్స్ను ఐదేళ్లపాటు రద్దు చేసినప్పటికీ, డాక్టర్ కరుణ పేరిట కొత్త లైసెన్స్తో సెంటర్ను మళ్లీ నడిపిస్తున్నట్లు తెలిసింది. ఈ కేసు దేశవ్యాప్తంగా విస్తరించిన అక్రమ నెట్వర్క్ను బయటపెట్టిందని, నిష్పక్షపాత దర్యాప్తు జరపాలని నెటిజన్లు డిమాండ్ చేస్తున్నారు.
