మాదాపూర్‌లో ఉన్న శ్రీచైతన్య (Sri Chaitanya) విద్యాసంస్థలకు చెందిన సెంట్రల్ కిచెన్ (Central Kitchen) లైసెన్స్‌ను ఫుడ్ సేఫ్టీ డిపార్ట్‌మెంట్ రద్దు చేసింది. ఈ ఘటన ఆదివారం చోటుచేసుకుంది, ఫుడ్ సేఫ్టీ అధికారులు ఆకస్మిక తనిఖీలు నిర్వహించగా, కిచెన్ నిబంధనలకు విరుద్ధంగా అపరిశుభ్రంగా ఉన్నట్లు వెల్లడైంది. వంటగదిలో ఆహార తయారీని తక్షణమే నిలిపివేయాలని ఆదేశిస్తూ ఉత్తర్వులు జారీ చేసింది.
ఫుడ్ సేఫ్టీ అధికారుల ఆదేశాల‌ను ఉల్లంఘించి ఆహారం తయారు చేస్తే కఠిన చర్యలు తీసుకుంటామంటూ వార్నింగ్ ఇచ్చింది. ఈ కిచెన్ నుంచి గ్రేటర్ హైదరాబాద్ పరిధిలోని శ్రీచైతన్య కాలేజీల హాస్టళ్లకు ఆహారం సరఫరా చేయబడుతుందని అధికారులు గుర్తించారు. అయితే, ఆహార పదార్థాలు పాడైపోవడం, కిచెన్ ఎలుక‌లు, బొద్దింక‌ల‌కు ఆవాసంగా మార‌డం, తయారు చేసే ఫుడ్ శుభ్రత లేకపోవడం వంటి సమస్యలు వెలుగులోకి రావడంతో, తక్షణ చర్యగా లైసెన్సు రద్దు చేశారు.
ఫుడ్ సేఫ్టీ నిబంధనలను పాటించకపోవడం విద్యార్థుల ఆరోగ్యానికి పెనుముప్పుగా మారే అవకాశం ఉందని అధికారులు హెచ్చరించారు. విద్యాసంస్థల యాజమాన్యం ఈ అంశంపై స్పందించాలని, తదుపరి చర్యలపై స్పష్టత ఇవ్వాలని వారు సూచించారు.
