మూడేళ్ల చిన్నారి పొలంలో ఆడుకుంటూ ప్రమాదవశాత్తు బోరుబావిలో పడిపోయింది. 150 అడుగుల లోతులో ఇరుక్కుపోయిన చిన్నారిని కాపాడేందుకు గత ఆరు రోజులుగా సహాయక బృందం నిరంతరం ప్రయత్నిస్తోంది. సోమవారం ఈ ఘటన జరగగా, ఇప్పటికీ చిన్నారిని బయటకు తీయకపోవడంపై స్థానికులు తీవ్ర అసంతృప్తి వ్యక్తం చేస్తున్నారు.
రాజస్థాన్లోని కోర్పుత్లీ జిల్లాలో జరిగిన ఈ విషాదకర ఘటన అందరి మనసును కలిచివేసింది. బావి మొత్తం 700 అడుగుల లోతు ఉండగా, బాలిక ప్రస్తుతం 150 అడుగుల లోతులో చిక్కుకుపోయినట్లు అధికారులు గుర్తించారు. సహాయక చర్యలకు భారీ యంత్రాలను ఉపయోగించడమే కాక, చిన్నారిని రక్షించేందుకు నిపుణులను సైతం రంగంలోకి దించారు.
బావిలోకి పైపుల ద్వారా ఆక్సిజన్ పంపుతున్నామని, ఆమె ఆరోగ్యం పట్ల జాగ్రత్తలు తీసుకుంటున్నామని అధికారులు తెలిపారు. బాలిక తల్లి భయాందోళనల మధ్య అధికార యంత్రాంగాన్ని వేడుకుంటూ తన కుమార్తెను రక్షించాలని కోరుతోంది. స్థానికులు కూడా ఘటనపై ఆందోళన వ్యక్తం చేస్తూ, సహాయక చర్యలు మరింత వేగంగా కొనసాగించాలని డిమాండ్ చేస్తున్నారు.
