శంషాబాద్ (Shamshabad) (హైదరాబాద్) ఎయిర్పోర్టు (Airport)లో సాంకేతిక లోపాల కారణంగా పలు విమాన సర్వీసులకు అంతరాయం ఏర్పడింది. ఢిల్లీ (Delhi), ముంబై, శివమొగ్గలకు వెళ్లాల్సిన విమానాలను (Flights) అధికారులు రద్దు (Cancelled) చేశారు. అంతేకాక, హైదరాబాద్-కౌలాలంపూర్, అలాగే వియత్నాం-హైదరాబాద్-గోవా మార్గాల్లో నడిచే విమానాల్లో కూడా సాంకేతిక సమస్యలు తలెత్తడంతో అవి రద్దయ్యాయి లేదా ఆలస్యంగా నడుస్తున్నాయి.
ఇదిలా ఉండగా, ఢిల్లీ ఎయిర్పోర్టులో కూడా గత 24 గంటల్లో దాదాపు 800 విమానాలు ఆలస్యంగా నడిచాయి, 26 విమానాలు రద్దు అయ్యాయి. ఢిల్లీ ఎయిర్ ట్రాఫిక్ కంట్రోల్ (ఏటీసీ) లోని ఆటోమేటెడ్ మెసేజ్ స్విచ్చింగ్ సిస్టమ్ (AMSS) లో తలెత్తిన లోపం ఈ అంతరాయానికి ప్రధాన కారణం.
సాంకేతిక లోపాల కారణంగా విమాన ప్రయాణికులకు తీవ్ర అసౌకర్యం కలిగింది. అయితే, ఢిల్లీ ఎయిర్పోర్టులో విమానాల రాకపోకలు నెమ్మదిగా సాధారణ స్థితికి చేరుకుంటున్నాయి. అధికారులు ఏటీసీలోని సాంకేతిక సమస్యలను పరిష్కరించేందుకు తీవ్రంగా ప్రయత్నిస్తున్నారు. అయినప్పటికీ, విమాన సేవలు పూర్తిగా మెరుగుపడటానికి మరియు సాధారణ స్థితికి రావడానికి మరికొంత సమయం పట్టే అవకాశం ఉందని అధికారులు స్పష్టం చేశారు. ఈ సాంకేతిక సమస్యల వల్ల ప్రయాణాలలో ఏర్పడిన అంతరాయంపై విమర్శలు వ్యక్తమవుతున్నాయి.
