బాలీవుడ్ సూపర్‌స్టార్ సల్మాన్ ఖాన్ (59) తాజాగా నెట్‌ఫ్లిక్స్‌లో ప్రసారమవుతున్న ‘ది గ్రేట్ ఇండియన్ కపిల్ శర్మ’ షో సీజన్ 3 తొలి ఎపిసోడ్‌లో పాల్గొని సంచలన వ్యాఖ్యలు చేశారు. మొద‌టి సారి ఆయన తన ఆరోగ్య స‌మ‌స్య గురించి నోరువిప్పారు. తీవ్రమైన వైద్య పరిస్థితులతో పోరాడుతూనే తన వృత్తిని కొనసాగిస్తున్నట్లు వెల్లడించిన సల్మాన్, వివాహం చేసుకోకపోవడం వెనుక భావోద్వేగ, ఆర్థిక కారణాలను కూడా పంచుకున్నారు. ఈ ఎపిసోడ్ సోషల్ మీడియాలో వైరల్‌గా మారడంతో, సల్మాన్ ఆరోగ్యం, జీవనశైలిపై అభిమానులు ఆందోళన వ్యక్తం చేస్తున్నారు.
సల్మాన్ ఖాన్, షో హోస్ట్ కపిల్ శర్మతో సరదాగా సాగిన సంభాషణలో తన ఆరోగ్య సమస్యల గురించి మాట్లాడారు. తాను “ట్రైజెమినల్ నీరాల్జియా” (ముఖంలో తీవ్ర నొప్పిని కలిగించే నరాల వ్యాధి), “బ్రెయిన్ యాన్యురిజం” (మెదడులో రక్తనాళంలో బల్గింగ్), “ఏవీ మాల్ఫార్మేషన్” (రక్తనాళాలలో అసాధారణ కనెక్షన్) వంటి తీవ్రమైన వైద్య సమస్యలతో బాధపడుతున్నట్లు వెల్లడించారు. “ప్రతిరోజూ ఎముకలు విరుగుతున్నాయి, పక్కటెముకలు ఫ్రాక్చర్ అయ్యాయి, ట్రైజెమినల్ నీరాల్జియాతో బాధపడుతూ, మెదడులో యాన్యురిజం, ఏవీ మాల్ఫార్మేషన్ ఉన్నప్పటికీ పని చేస్తున్నాను. నడవలేకపోతున్నా డ్యాన్స్ చేస్తున్నాను, యాక్షన్ సన్నివేశాలు చేస్తున్నాను,” అని సల్మాన్ తెలిపారు. 2017లో ‘ట్యూబ్‌లైట్’ చిత్ర ప్రమోషన్ సందర్భంగా దుబాయ్‌లో జరిగిన ఈవెంట్‌లో సల్మాన్ తొలిసారి ట్రైజెమినల్ నీరాల్జియా గురించి మాట్లాడారు, దీనిని “సూసైడ్ డిసీజ్” అని పిలుస్తారని, తీవ్ర నొప్పి వల్ల ఆత్మహత్య ప్రవృత్తులు కలుగుతాయని వివరించారు.
వివాహం గురించి కపిల్ శర్మ ప్రశ్నించగా, సల్మాన్ తన విలక్షణ హాస్యంతో సమాధానమిచ్చారు. “వివాహం, విడాకులు భావోద్వేగపరంగా, ఆర్థికంగా చాలా కష్టం. ఈ వయసులో సంపాదించిన సంపదలో సగం భార్య తీసుకెళ్తే, మళ్లీ ఆ స్థాయిలో సంపాదించడం సాధ్యం కాదు. యువకుడిగా ఉంటే మళ్లీ సంపాదించగలిగేవాడిని, కానీ ఇప్పుడు అది కష్టం,” అని చెప్పారు. “నీవు ఎందుకు పెళ్లి చేసుకోవడం లేదని అడిగితే, అది ఎవరి జీవితంలో ఏం మార్పు తెస్తుంది? ఓపిక, భార్యాభర్తల మధ్య త్యాగం, సహనం లేని ఈ రోజుల్లో విడాకులు సర్వసాధారణమయ్యాయి,” అని ఆయన వ్యాఖ్యానించారు. సల్మాన్ ఈ వ్యాఖ్యలు సోషల్ మీడియాలో వైరల్ అవడంతో, అభిమానులు ఆయన ఆరోగ్యం కోసం ప్రార్థనలు చేస్తూ, ఆయన స్థైర్యాన్ని మెచ్చుకుంటున్నారు.
