రంగారెడ్డి జిల్లా మహేశ్వరం మండలం రావిర్యాల గ్రామంలో దొంగలు రెచ్చిపోయారు. మార్చి 2 తెల్లవారుజామున, స్టేట్ బ్యాంక్ ఆఫ్ ఇండియా (SBI) ఏటీఎంలో భారీ దొంగతనం జరిగింది. కారులో వచ్చిన నలుగురు గుర్తుతెలియని వ్యక్తులు పూర్తి వ్యూహాత్మకంగా దోపిడీకి పాల్పడ్డారు.
ముందుగా, సీసీ కెమెరాలపై స్ప్రే కొట్టి అవి పని చేయకుండా చేశారు. తర్వాత ఎమర్జెన్సీ సైరన్ మోగకుండా సెన్సార్ వైర్లను కట్ చేశారు. గ్యాస్ కట్టర్, ఇనుప రాడ్ల సహాయంతో ఏటీఎంను బద్దలు కొట్టి, కేవలం నాలుగు నిమిషాల్లోనే రూ. 30 లక్షలు అపహరించారు.
పోలీసుల దర్యాప్తు
సమాచారం అందుకున్న మహేశ్వరం డీసీపీ సునీతారెడ్డి, ఏసీపీ రాజు సంఘటనా స్థలాన్ని పరిశీలించారు. ప్రత్యేక బృందాలను ఏర్పాటు చేసి, సీసీటీవీ ఫుటేజీ ఆధారంగా నిందితుల కదలికలను గుర్తించే ప్రయత్నాలు కొనసాగుతున్నాయి. రెండు రోజుల క్రితమే ఏటీఎంలో రూ. 30 లక్షలు నిక్షిప్తం చేశారని బ్యాంక్ మేనేజర్ వెల్లడించారు. ఈ ఘటన స్థానిక ప్రజలను తీవ్ర ఆందోళనకు గురి చేసింది.
