ఉపరాష్ట్రపతి (Vice President) ఎన్నికల్లో (Elections) ఇండియా కూటమి (India Alliance) అభ్యర్థిగా బరిలోకి దిగిన జస్టిస్ (Justice) సుదర్శన్ రెడ్డి (Sudarshan Reddy) గెలుపుకు తెలుగు ప్రజలందరూ సహకరించాలని తెలంగాణ (Telangana) ముఖ్యమంత్రి (Chief Minister) రేవంత్ రెడ్డి (Revanth Reddy) వ్యక్తిగతంగా కోరారు. ఎన్నికలు, రాజకీయాలు, వివాదాలు తర్వాత మాట్లాడుకోవచ్చని, కానీ ఇప్పుడు తెలుగువారి ప్రతిష్ఠను పెంచేందుకు సుదర్శన్ రెడ్డి గెలుపు ఎంతో ముఖ్యమని ఆయన అన్నారు. ఈ సందర్భంగా ఆయన హైదరాబాద్‌ (Hyderabad)లోని తాజ్ కృష్ణ (Taj Krishna)లో సుదర్శన్ రెడ్డితో సమావేశమయ్యారు.
అందరూ సహకరించాలి
సీఎం రేవంత్ రెడ్డి మీడియాతో మాట్లాడుతూ… “మన తెలుగు ప్రజలందరూ సుదర్శన్ రెడ్డి గారిని అభినందించాలి. మనం అందరం ఆయన గెలుపు కోసం నిర్ణయం తీసుకోవాలి. తెలుగువారి ఉనికి ప్రమాదంలో ఉన్న ఈ తరుణంలో సుదర్శన్ రెడ్డి గారు ఈ ఎన్నికలో పోటీ చేయడం ఎన్డీయే కూటమికి ఒక బలమైన సవాలు. రాజ్యాంగాన్ని, రిజర్వేషన్లను కాపాడాలంటే ఆయన గెలవడం అవసరం. ముఖ్యమంత్రి చంద్రబాబు నాయుడు, ఉప ముఖ్యమంత్రి పవన్ కళ్యాణ్, మాజీ ముఖ్యమంత్రులు వైఎస్ జగన్, కేసీఆర్, ఎమ్మెల్యే అసదుద్దీన్… వీరందరూ ఆయన గెలుపుకు కృషి చేయాలని వ్యక్తిగతంగా కోరుతున్నాను” అని అన్నారు.
సుదర్శన్ రెడ్డి సరైన వ్యక్తి
జస్టిస్ సుదర్శన్ రెడ్డి గెలుపు వల్ల తెలుగువారి ప్రతిష్ఠ మరింత పెరుగుతుందని రేవంత్ రెడ్డి పేర్కొన్నారు. ఓట్ల చోరీతో బీజేపీ గెలవాలని చూస్తున్న తరుణంలో, పెద్దల సభ (రాజ్యసభ) సజావుగా సాగాలంటే, ప్రజాస్వామ్యం భద్రంగా ఉండాలంటే జస్టిస్ సుదర్శన్ రెడ్డి సరైన వ్యక్తి అని ఆయన చెప్పారు. ఒక న్యాయమూర్తిగా, లౌకికవాదిగా, పేదల పక్షపాతిగా అన్ని విధాలా ఆయన ఈ పదవికి అర్హుడని తెలిపారు. ఈ సమావేశంలో సీఎం రేవంత్‌తో పాటు కాంగ్రెస్ ఎంపీలు, ఎమ్మెల్యేలు, ఎమ్మెల్సీలు, పీసీసీ చీఫ్ మహేష్ కుమార్ గౌడ్ కూడా పాల్గొన్నారు.
